«ГУМГАШТАПАЙДО» ДАР «КОХИ ҶОМӢ» МУАРРИФӢ ШУД

                 Душанбе, 21 апрел.(АМИТ «Ховар», Марзия Саидова).- Филми ҳунарии «Гумгаштапайдо» дар «Кохи Ҷомӣ» — и пойтахт бо иштироки аҳли фарҳангу ҳунари кишвар муаррифӣ гардид. Филми мазкур аз рӯи асари шоири Халқии Тоҷикистон Муҳаммад Ғоиб ба навор гирифта шуда, коргардони он ҳунарманди халқии ҷумҳурӣ Юнус Юсуфов мебошад.                Муаллифи асари мазкур Муҳаммад Ғоиб мегӯяд, ки асари «Гумгаштапайдо» дар бораи сарнавишт ва паҳлуҳои гуногуни ҳаёти одамон нақл мекунад. Филми «Гумгаштапайдо» арзишҳои бузурги инсонӣ — меҳру муҳаббати самимӣ, садоқату вафодориро, ки рӯзгори инсонҳоро ҷовидонӣ мегардонад, таҷассум намудааст.                 Ҳунармандони шинохтаи ҷумҳурӣ Соро Сабзалиева, Саидҷалол Саидов, Асламшоҳ Раҳматуллоев ва дигарон нақшҳои асосиро хеле моҳирона ва бо истеъдоди баланди ҳунарӣ иҷро намудаанд. Филм дар зарфи 1 сол дар минтақаҳои гуногуни ҷумҳурӣ рӯи навор омадааст.                Филм бо забони тоҷикӣ ба навор гирифта шуда, он бо забонҳои русӣ ва англисӣ тарҷума гардид. Дар назар аст, ки дар оянда филми «Гумгаштапайдо» дар озмунҳои байналмилалӣ пешниҳод карда мешавад.