КОРХОНАҲОИ КӮЛОБ НИЗ ДАР ОЗМУН ШИРКАТ МЕВАРЗАНД

                 Душанбе, 14 апрел. (АМИТ «Ховар», Бекназари Абӯбакр). — Панҷ корхонаи минтақаи Кӯлоби вилояти Хатлон барои иштирок дар озмуни ҷумҳуриявии «Маҳсулоти беҳтарини Тоҷикистон» омодагӣ гирифтаанд.                  Аз маркази матбуоти Агентии давлатии «Тоҷикстандарт» ба мухбири АМИТ «Ховар» хабар доданд, ки Иттиҳодияи ҷамъиятии «Ориён Рустам», ки ба истеҳсоли ҳасиб, равғани растанӣ ва оби минералӣ машғул аст ва Ширкати «Чакан», ки сару либоси миллӣ истеҳсол мекунад аз ҷумлаи онҳоянд.                  Бояд гуфт, ки озмун дар якчанд марҳила доир гардида, аввал ғолибон дар шаҳру ноҳияҳо муайян мешаванд ва ин озмун дар арафаи Иди Истиқлолияти давлатии Тоҷикистон дар пойтахти кишвар ҷамъбаст карда мешавад.