КОРХОНАҲОИ НАВ БУНЁД МЕГАРДАНД

              Душанбе, 9 апрел. (АМИТ «Ховар», Кристина Эрлих). — Мувофиқи барномаи ҳукуматии коркарди нахи пахта ва аз он истеҳсол намудани маҳсулоти тайёр то соли 2015 дар мамлакат 7 корхонаи калобаресӣ бунёд карда мешавад. Давлат барои тезонидани суръати сохтмони онҳо ба мӯҳлати 12 сол имтиёзҳои гумрукӣ ва андоз муқаррар намуд. Корхонаҳои мазкур мувофиқи ҷадвали тасдиқшуда ба кор дароварда мешаванд.              Аз вазорати энергетика ва саноати ҷумҳурӣ ба АМИТ «Ховар» хабар доданд, ки моҳи июли соли равон корхонаи муштараки Тоҷикистону Эрон «Нику — Хуҷанд», моҳи сентябр Ҷамъияти саҳҳомии «Спитамен» ва охири сол Ҷамъияти саҳҳомии «Хима — Текстил» ба кор дароварда мешаванд. Бояд гуфт, ки таъсири бӯҳрони ҷаҳонии молиявӣ имрӯзҳо дар саноати сабуки мамлакати мо низ ҳис карда мешавад.    Таъсири он хусусан ба содироти маҳсулоти корхонаҳои саноатӣ бештар аст. Зеро нархи хариди нахи пахта дар бозори ҷаҳонӣ хеле паст фуромад.                 Вале баъзе корхонаҳо роҳҳои ҳалли проблемаҳои мавҷударо меёбанд. Масалан, корхонаҳои дӯзандагии «Текстил — Сити» ва «Гулистон» ба туфайли омӯҳтани талаботи бозор истеҳсоли навъҳои нави маҳсулотро ба роҳ монданд. Корхонаи дӯзандагии «Сано» — и Хуҷанд низ ҳамин усулро пеш гирифта, истеҳсоли маҳсулотро торафт бештар мегардонад.               Мухбири АМИТ «Ховар» ёдовар мешавад, ки имрӯз нархи як тонна нахи пахта дар бозори ҷаҳон 1162 доллари ИМА мебошад, ҳол он ки нархи он як сол пеш 1300 доллари ИМА буд.