КОРХОНАҲОИ ТОҶИКИСТОН СОҲИБИ ГУВОҲНОМАИ ISO 22000

                  Душанбе, 22 апрел. (АМИТ «Ховар», Бекназари Абӯбакр). — Бори аввал дар минтақаи Осиёи Марказӣ ду корхонаи коркарди меваву сабзавот аз Ҷумҳурии Тоҷикистон соҳиби гувоҳномаи мутобиқат ба меъёрҳои байналмилалии ISO 22000 — Низоми мудирияти бехатарии маводи ғизоӣ гардиданд.                   Ин корхонаҳо ҶММ «Элита Истаравшан» ва ҶММ «Илмӣ-истеҳсолии иттифоқи Тоҷикматлубот» мебошанд ва даст ёфтанашон ба ин комёбӣ дар чаҳорчӯби Барномаи «Пешбурди тиҷорат дар Тоҷикистон» сурат гирифтааст.                   Муовини аввали раиси Раёсати Иттифоқи «Тоҷикматлубот» Тӯхтабой Маҳмудов зимни сӯҳбат бо мухбири АМИТ «Ховар» гуфт, ки бозрасӣ (аудит)-и ин корхонаҳо ва додани гувоҳнома аз ҷониби ширкати Det Norske Veritas AS (DNV, Норвегия) сурат гирифта, ширкати мазкур оҷонсии мустақили гувоҳномадиҳӣ мебошад. DNV дар 100 кишвари ҷаҳон 300 дафтар дошта, бозрасии корхонаҳои Тоҷикистонро хонум Сапна Шукла, бозраси дафтари ҳиндустонии ширкати Det Norske Veritas AS анҷом додааст.                  Бояд гуфт, ки сазовор гаштан ба чунин гувоҳномаи байналмилалӣ имиҷ ва эътибори корхонаҳои мазкурро боло бурда, мавқеъашонро дар бозор боз ҳам мустаҳкамтар мегардонад.