МАҚОМИ БМ ВА БТ ДАР ИДОРАСОЗИИ БӮҲРОНИ МОЛИЯВӢ

                  Душанбе, 4 апрел. (АМИТ «Ховар», Бекназари Абӯбакр). — 3 апрел ҳайати Бонки рушди Осиё, ки аз 1 апрели соли ҷорӣ ба Ҷумҳурии Тоҷикистон ҷиҳати мулоқоту вохӯриҳо бо як каттор бонкҳо дар мавзӯи «Мақоми бонки марказӣ ва бонкҳои тиҷоратӣ дар идорасозии бӯҳрони молиявӣ» ташриф овардаанд, бо роҳбарияти Бонки давлатии амонатгузории Ҷумҳурии Тоҷикистон «Амонатбонк» мулоқот намуданд.                   Аз Хадамоти матбуот ва рекламаи БДА ҶТ «Амонатбонк» ба мухбири АМИТ «Ховар» иттилоъ доданд, ки дар ҷараёни мулоқот миёни мушовири БРО Арне Боруб Петерсон бо Раиси Раёсати БДА ҶТ «Амонатбонк» Маҳмадамин Маҳмадаминов ва дигар шахсони расмӣ атрофи таъсир ва чораҳои пешгирии бӯҳрони иқтисодию молиявӣ ва вазъи имрӯзаи сохтори «Амонатбонк» сӯҳбати пурмӯҳтаво сурат гирифт.                  Инчунин, дар мулоқоти мазкур вазъи имрӯзаи кишоварзӣ, саноату тиҷорат ва дигар соҳаҳои асосии иқтисодиёти      Ҷумҳурии Тоҷикистон мавриди баррасӣ ва омӯзиш қарор гирифт. Ҷонибҳо дар анҷоми мулоқот аз ҳамкориҳои самарабахш ва ояндасози ҳар ду тараф дар оянда ибрози андеша карданд.                  Қайд кардан ба маврид аст, ки мутахассисони «Амонатбонк» ҷиҳати пешгирии бӯҳрони милиявию иқтисодӣ дар ҳамкорӣ бо дигар мақомоту ташкилотҳои ҷумҳурӣ як идда чорабиниҳоро ба нақша гирифта, фаъолияти рӯзмарраи сохторҳои бонкро дар маҳалҳо аз рӯи онҳо ба роҳ мондаанд.