ММД НИСБАТ БА ҲАМИН ДАВРАИ СОЛИ ГУЗАШТА 3,5 ФОИЗ АФЗОИШ ЁФТ

                Душанбе, 28 апрел. (АМИТ «Ховар», Бекназари Абӯбакр). — «Маҷмӯи маҳсулоти дохилӣ (ММД) нисбат ба ҳамин давраи соли гузашта 3,5 фоиз афзоиш ёфта, ҳачми номиналии он 3312,5 млн. сомониро ташкил дод, ки ин нишондиҳанда ба ҳар як сари аҳолӣ 446 сомониро ташкил дода, нисбат ба ҳамин давраи соли гузашта 18,6 фоиз зиёд гардидааст», — гуфт зимни нишасти матбуотӣ 27 апрел, муовини аввали вазири рушди иқтисод ва савдои Ҷумҳурии Тоҷикистон Амонулло Ашӯр.                 Ӯ афзуд, ки болоравии рушди иқтисодиёт дар семоҳаи аввали соли ҷорӣ асосан аз ҳисоби зиёдшавии ҳаҷми истеҳсоли маҳсулоти кишоварзӣ -108,7 фоиз, фаъолшавии сармоягузорӣ — 1,5 маротиба, инчунин баланд шудани талаботи истеъмолӣ ба мол ва хизматрасониҳо дар бозори дохилӣ — мутаносибан 116,2 фоиз ва 104,5 фоиз ба амал омад. Бояд гуфт, ки дар ин давра даромади буҷет дар сатҳи 86,4 фоиз иҷро шуда, ба буҷет 977,1 млн. сомонӣ ворид гардид. Нақшаи воридоти андозҳо ба буҷети давлатӣ 86,4 фоиз иҷро гардида, 812.1 млн. сомониро ташкил дод.                Гуфтанист, ки музди миёнаи номиналии як коргар дар моҳҳои январ-феврали соли ҷорӣ 283.9 сомониро ташкил дод, ки ин нисбат ба ҳамин давраи соли гузашта 33,1 фоиз зиёд аст. Музди меҳнати ҳақиқӣ нисбат ба ҳамин давраи соли гузашта 20,4 фоиз афзоиш ёфтааст.               Дар фарҷом А. Ашӯр ва дигар муовинони вазиру сардорони раёсатҳои вазорат ба саволҳои хабарнигорон посух доданд.