МУБТАЛОЁНИ ДИАБЕТИ ҚАНД ТАҲТИ ҲИМОЯ ҚАРОР МЕГИРАНД

                Душанбе, 2 апрел.(АМИТ «Ховар», Марзия Саидова).-Тибқи нишондодҳои оморӣ то соли 2030 теъдоди мубталоёни бемории диабети қанд дар саросари ҷаҳон 4,4 % афзоиш ёфта, ба 366 миллион мерасад. Чунин зикр кард аъзои Кумита оид ба масъалаҳои иҷтимоӣ, оила, ҳифзи сиҳатӣ ва экологияи Маҷлиси намояндагони Маҷлиси Олии ҷумҳурӣ Ҷумъабой Сангинов зимни баррасии лоиҳаи қабули Қонуни Ҷумҳурии Тоҷикистон «Дар бораи ҳимояи тиббию иҷтимоии шаҳрвандони мубталои диабети қанд». Ин қонунро 1 апрел Маҷлиси намояндагони Маҷлиси Олии ҷумҳурӣ қабул кард.            Ҷумъабой Сангинов гуфт, ки қонуни мазкур бо мақсади танзими қонунгузории кишвар, мутобиқат намудан ба принсипҳои санадҳои байналмилалии эътирофнамудаи Ҷумҳурии Тоҷикистон ва таъмини ҳифзи иҷтимоии шаҳрвандони мубталои диабети қанд дар Тоҷикистон таҳия ва қабул карда шуд. Ин қонун аз 5 боб ва 23 модда иборат аст.             Ба андешаи Ҷ. Сангинов бемории диабети қанд бемориест, ки дар байни шахсони сину солашон гуногун паҳн шуда, он сол аз сол афзоиш меёбад. Тибқи нишондодҳои оморӣ алҳол дар Тоҷикистон беш аз 17 ҳазор мубталоёни диабети қанд ба қайд гирифта шуда, беш аз 1500 нафари онҳо дар давоми се сол бо инсулин таъмин шудаанд. Механизми ба таври ройгон тақсим кардани дору ба мубталоёни ин беморӣ дар доираи ду қарори Ҳукумати ҷумҳурӣ амалӣ гардонида мешавад. Аз ҷониби лоиҳаи амрикоии ХОУП ба ҷумҳурӣ дар давоми соли 2008-ум 38 ҳазор шишачаи инсулин оварда шуд.            Ҷ. Сангинов мегӯяд, ки бемории диабети қанд моҳияти иҷтимоӣ дошта, ҷиҳати пешгирӣ ва табобати мубталоёни ин беморӣ Ҳукумат ва парлумони кишвар тадбирҳои зарурӣ ва саривақтӣ меандешад. Қабули қонуни мазкур яке аз он тадбирҳост, ки он ба ҳимояи тиббию иҷтимоии шаҳрвандони мубталои диабети қанд нигаронида шудааст.