МУЛОҚОТИ ВАЗИРОНИ КОРҲОИ ХОРИҶИИ ИДМ ДАР АШҚОБОД

               Душанбе, 10 апрел. (АМИТ «Ховар», Наргис Бояхмедова). — Имрӯз дар пойтахти Туркманистон — Ашқобод маҷлиси навбатии Шӯрои вазирони корҳои хориҷии давлатҳои ИДМ кушода мешавад. Ба ҳайати Тоҷикистон дар ин маҷлис вазири корҳои хориҷии ҷумҳурӣ Ҳамрохон Зарифӣ роҳбарӣ мекунад. Дар маросими кушодашавии маҷлиси мазкур Президенти Туркманистон Қурбонгулӣ Бердимуҳаммадов сухан хоҳад кард.              Мухбири АМИТ «Ховар» хабар медиҳад, ки дар маҷлис қариб 20 масъалаи марбут ба ҳамкорӣ дар соҳаҳои сиёсӣ, муҳоҷират, гуманитарӣ, иҷтимоӣ ва таъмини амният муҳокима карда мешаванд. Дар фарҷоми маҷлис силсилаи ҳуҷҷатҳо имзо карда хоҳанд шуд.              Вазири корҳои хориҷии Тоҷикистон Ҳамрохон Зарифӣ зимни сафар дар Ашқобод бо Президенти Туркманистон Қ.Бердимуҳаммадов ва иштирокчиёни дигари маҷлис мулоқотҳо анҷом медиҳад.