МУНШИИ УМУМИИ СААД БА ДУШАНБЕ МЕОЯД

              Душанбе, 11 апрел. (АМИТ «Ховар», Темур Бандишоев). — Рӯзҳои наздиктарин баъзе роҳбарони баландпоя ва мансабдорони созмонҳои мӯътабари байналхалқӣ ба Тоҷикистон ташриф меоранд. Аз вазорати корҳои хориҷии ҷумҳурӣ ба АМИТ «Ховар» хабар доданд, ки сафири кабири Канада дар Тоҷикистон Маргарет Скок 13 апрел ба Душанбе хоҳад омад. Аз 15 то 17 апрел дар Душанбе семинари минтақавии Ассамблеяи парлумонии Созмони амнияту ҳамкории Аврупо гузаронида мешавад. Дар он проблемаи коргарони муҳоҷир муҳокима карда мешаванд. Барои иштирок дар семинари мазкур намояндагони мамлакатҳои аъзои Ассамблеяи парлумонии САҲА аз мамлакатҳои Осиёи Марказӣ, Туркия, Афғонистон ва Аврупо ба Душанбе ташриф меоранд.                Хабар дода мешавад, ки вазири корҳои хориҷии Португалия Луиш Амаду 16 апрел ба Душанбе меояд, Муншии умумии Ассамблеяи парлумонии НАТО Давид Хобс 20 апрел барои боздиди кории дурӯза ба Душанбе хоҳад омад. Вай бо роҳбарони баландпояи ҷумҳурӣ, раисони Маҷлиси миллӣ ва Маҷлиси намояндагони Маҷлиси олии ҷумҳурӣ, вазири корҳои хориҷӣ ва шахсони дигари расмӣ мулоқотҳо анҷом медиҳад.               23 апрел ташрифи Муншии умумии Созмони аҳдномаи амнияти дастаҷамъӣ Николай Бордюжа ба Душанбе пешбинӣ карда мешавад.