НУФУЗИ ТОҶИКИСТОН ДАР КИШВАРҲОИ АРАБӢ БОЛО МЕРАВАД

                   Андешаҳои Президенти Ҷумҳурии Тоҷикистон Эмомалӣ Раҳмон таҳти унвони «Имоми Аъзам ва ҳуввияти миллии мардуми тоҷик» ба забони арабӣ тарҷума ва дар нашрияҳои кишварҳои араб чоп шуда, боиси хушҳолию сарфарозии мусулмонони ин давлатҳо аз таҷлили 1310-солагии ин нобиғаи илми фиқҳ дар Тоҷикистон гаштааст.                   Аз ҷумла дар муқоваи маҷаллаи бонуфузи олами Ислом, ки таҳти унвони «ал-Азҳар» дар Ҷумҳурии Мисри Араб нашр мегардад, чунин омадааст: «Ҷаноби Олӣ, Эмомалӣ Раҳмон, Президенти Ҷумҳурии Тоҷикистон дар бораи Имоми Аъзам Абӯҳанифа Нуъмон мақолаҳо менависад».                  Дар 11 саҳифаи ин маҷалла мақолаи илмии Эмомалӣ Раҳмон оид ба зиндагии ибратбахши Имоми Аъзам, нақши эҷодиёти гаронбаҳои ӯ дар ташаккули ҳуввияти миллии тоҷикон ва ҳамчунин дар рушду нумӯи беназири илми фиқҳи исломӣ чоп шудааст.                  Дар воқеъ тадбирҳои арзишманди Сарвари давлати Тоҷикистон Эмомалӣ Раҳмон оид ба тарғибу ташвиқи фарҳанги миллию динии тоҷикон, аз ҷумла дар чаҳорчӯби Соли Имоми Аъзам гузарондани чорабиниҳои зиёди илмию фарҳангӣ натанҳо ба таҳкими ваҳдату ягонагии мардуми кишвар, балки ба муаррифии фарҳанги пурғановати миллати бостонии тоҷик дар минтақа ва ҷаҳон мусоидат мекунанд.                  Дар маҷаллаи дигаре, ки таҳти унвони «Анбаъу Мускув» (Навидҳои Маскав) бо забони арабӣ дар Ҷумҳурии Мисри Араб нашр мегардад, андешаҳои Эмомалӣ Раҳмон аз китоби «Тоҷикон дар оинаи таърих чоп шудаанд.                  Ин равандро коршиносон нишона аз болоравии обурӯю нуфузи Тоҷикистон ва Сарвари он Эмомалӣ Раҳмон дар арсаи минтақа ва ҷаҳон, аз ҷумла дар кишварҳои арабию мусулмонӣ маънидод мекунанд.