РОҲИ ДУШАНБЕ-ЧАНАК БОСУРЪАТ СОХТА МЕШАВАД

              Душанбе, 17 апрел. (АМИТ «Ховар», Жасмин Назарова). Дар Муассисаи давлатии «Маркази татбиқи лоиҳаи таҷдиди роҳи нақлиётгарди Душанбе-Чанак» бо иштироки намояндагони васоити ахбори оммавӣ нишасти матбуотӣ баргузор гардид.                Тавре директори муассисаи мазкур Қодир Саидов иттилоъ дод, роҳи нақлиётгарди Душанбе-Чанак, яке аз шоҳроҳҳои Ҷумҳурии Тоҷикистон ба ҳисоб меравад. Мақсад аз татбиқи лоиҳа мусоидат намудан дар рушду нумӯи иҷтимоӣ ва иқтисодии қисматҳои ҷанубу шимоли Ҷумҳурии Тоҷикистон ба воситаи таҷдид ва барқарор намудани роҳи Душанбе-Хуҷанд-Чанак, нақби Шаҳристон, сохтмони галереяҳо, кӯпрукҳо ва дигар иншоотҳои ёрирасон мебошад.                Бояд қайд намуд, ки маблағи умумии лоиҳа 295,9 млн. доллари ИМА-ро ташкил медиҳад, ки аз он 281,1 млн. доллар қарзи Бонки содироту воридоти Ҷумҳурии Халқии Хитой, 14,8 млн. доллари ИМА саҳми Ҳукумати Ҷумҳурии Тоҷикистон мебошад. То имрӯз 249,53 млн. доллари ИМА пардохт карда шудааст, ки 235,10 млн. доллари ИМА қарзи Бонки содироту воридоти Ҷумҳурии Халқии Хитой ва 14,43 млн. доллари ИМА саҳми Ҳукумати Ҷумҳурии Тоҷикистон мебошад.                 Таҷдиди роҳи автомобилгарди Душанбе-Чанак бо дарозии 335,4 км, сохтмони 39 адад кӯпрукҳои хурд, миёна ва калон бо дарозии 1 777 метр, васл ва хобонидани 352 адад қубурҳои обгузари зери роҳ бо дарозии 5 974 метр, деворҳои ҳимоявии роҳ 13 100 метр, ҷӯйборҳои шафати роҳ (аз санг ва бетон) бо дарозии 215,2 км бо арзиши умумии 169,5 млн. доллари ИМА амалӣ мешавад.