СӮҲБАТИ МУНШИИ УМУМИИ СААД БО ХАБАРНИГОРОН

                 Душанбе, 24 апрел. (АМИТ «Ховар», Темур Бандишоев). — Президенти Ҷумҳурии Тоҷикистон Эмомалӣ Раҳмон имрӯз бо Муншии умумии Созмони аҳдномаи амнияти дастаҷамъӣ Николай Бордюжа мулоқот кард. Муншии умумии СААД баъди анҷоми мулоқоташ бо Президент зимни сӯҳбат бо хабарнигорон дар бораи натиҷаҳои он маълумоти мухтасар дод. Вай, аз ҷумла, зикр намуд, ки ба Сарвари давлати Тоҷикистон дар бораи тадбирҳои дар доираи созмон андешидашаванда, аз ҷумла, тайёрӣ ба иҷлосияи Шӯрои амнияти дастаҷамъӣ маълумот додааст. Иҷлосияи мазкур 14 июн дар Маскав баргузор мегардад. Дар он теъдоди зиёди масъалаҳои вобаста ба ташкили воҳидҳои низомӣ, ҳамоҳанг сохтани фаъолияти сиёсати берунӣ, тақвияти мубориза ба муқобили терроризм ва хариду фурӯши ғайриқонунии маводи нашъадор муҳокима карда мешаванд. Аз ҳама муҳимаш ҳамин аст, ки мо мехоҳем ба сарони давлатҳо маҷмӯи ҳуҷҷатҳои меъёрию ҳуқуқии марбут ба ташкили Қувваҳои дастаҷамъии вокуниши таъҷилиро пешниҳод намоем, гуфт Николай Бордюжа.                   Вай афзуд, ки зимни мулоқот бо Эмомалӣ Раҳмон масъалаи вобаста ба ташкилу фаъолияти Қувваҳои дастаҷамъии вокуниши таъҷилӣ, ҳайати мансубини он, зарурати ҳатмии омода сохтани ҳуҷчатҳо ва заминаи меъёрие муҳокима карда шуд, ки ба истифодаи ҳатмӣ ва самарабахши ин қувваҳо дар мавриди ба миён омадани муноқишаҳои имконпазир шароит муҳайё месозанд.                 Муншии умумии СААД зимни ҷавоб ба саволҳои хабарнигорон изҳор намуд, ки айни ҳол ба ҳайати Қувваҳои дастаҷамъии вокуниши таъҷилӣ 11 баталён дохил мешавад. Ин қувваҳо, тибқи нақша дар минтақаи Осиёи Марказӣ ҷой дода мешаванд. Қувваҳои мазкурро на танҳо давлатҳои Осиёи Марказӣ, балки давлатҳои Аврупои Шарқӣ ва Қафқоз низ ташкил хоҳанд дод. Бояд гуфт, ки ба ин қувваҳо на баталёнҳои алоҳида, балки ҷузъу томҳои нисбатан калонтари ҳарбӣ, аз ҷумла, бригадаҳо ё дивизияҳои таъиноти махсус шомил карда мешаванд. Шарти асосии ташкили онҳо муҳайё сохтани шароиту имконияти хеле зуд ҷой иваз карданашон дар қаламрави давлатҳои аъзои СААД мебошад. Дар оянда ба ҳайати Қувваҳои дастаҷамъии вокуниши таъҷилӣ ҷузъу томҳои таъиноти махсус аз қисмҳои ҳарбии мақомоти амниятӣ ва мақомоти махсуси корҳои дохилӣ шомил карда мешаванд, гуфт дар хотима Николай Бордюжа.                                                                           Тарҷумон — Қудратов А.