САФАРИ ҒАЙРИЧАШМДОШТИ ВАЗИРИ КОРҲОИ ХОРИҶИИ ОЛМОН БА АФҒОНИСТОН

               Кобул, 30 апрел. (АМИТ «Ховар» — Евронюс). — Вазири корҳои хориҷии Олмон Франк Валтер Штайнмайер ғайричашмдошт ба Афғонистон сафар кард. Вай зимни мулоқоташ бо Президенти Афғонистон Ҳамид Карзай ӯро дилпур сохт, ки маъмурияти мамлакаташ ба таври илова ба Афғонистон 600 хизматчии ҳарбиро мефиристад. Онҳо дар ҳайати қисмҳои ҳарбии эътилофии хориҷӣ барои таъмини амнияти мамлакат истифода бурда мешаванд.                  Вазири корҳои хориҷии Олмон ба ҷалби Покистон ба ҳалли масъалаҳои таъмини амният баҳои баланд дод. Вай зикр намуд, ки айни ҳол дар Вашингтон гуфтушуниди намояндагони Покистону ИМА давом дорад. Таъмини амнияти Афғонистон ва бехатарии гузаронидани интихоботи Президенти он ба натиҷаҳои ҳамин гуфтушунид вобаста аст.                 Хабар дода мешавад, ки дар рӯзи ба Кобул омадани вазири корҳои хориҷии Олмон 5 аскари олмонӣ дар натиҷаи амалиёти террористӣ сахт маҷрӯҳ гардиданд. Масъулияти амалиётро яке аз гурӯҳҳои маҳаллии ҷунбиши «Толибон» ба зиммаи худ гирифт.