САРВАЗИРИ МАМЛАКАТ АЗ КОРХОНАҲОИ САНОАТИИ СУҒД ДИДАН МЕКУНАД

                 Душанбе, 4 апрел. (АМИТ «Ховар», Бекназари Абӯбакр). — Сарвазири Ҷумҳурии Тоҷикистон Оқил Оқилов бо мақсади шиносоӣ бо вазъи корхонаҳои саноатӣ, пойгоҳҳои обкашӣ ва дигар иншооти обтаъминкунии вилояти Суғд ба ин вилоят сафари корӣ анҷом медиҳад.                Субҳи имрӯз, нахуст Сарвазири мамлакат аз ҶСШК «Новселмаш»-и ноҳияи Спитамен ва пойгоҳҳои обкашии ноҳияи Зафаробод дидан намуда, бо шарту шароити фаъолият ва вазъи техникии онҳо шинос шуд.                 Нимаи дуюми рӯз Оқил Оқилов аз иншооти ҷашние, ки бахшида ба 20-умин солгарди Истиқлолияти давлатии Тоҷикистон ва Рӯзи ваҳдати миллӣ дар маркази вилояти Суғд — шаҳри Хуҷанд бунёд мегардад дидан мекунад.                  Мавриди зикр аст, ки сафари кории Сарвазири ҷумҳурӣ дар вилояти Суғд то 6 апрел идома ёфта, дар назар аст, ки дар ҷараёни он Оқил Оқилов бо фаъолияти корхонаҳои саноатӣ ва иншооти обтаъминкунии дигар шаҳру ноҳияҳои вилоят шинос шавад. Дар фарҷоми сафар Сарвазири мамлакат дар шаҳри Хуҷанд бо иштироки роҳбарони корхонаҳои саноатӣ ва иншооти обтаъминкунии вилоят машварати корӣ доир хоҳад кард, ки дар он натиҷаҳои сафараш ҷамъбаст карда мешавад.