ШУМОРАИ КОРГАРОНИ МУҲОҶИРИ ТОҶИК АЗ ЯК МИЛЛИОН НАФАР ЗИЁД АСТ

                 Душанбе, 17 апрел. (АМИТ «Ховар», Наргис Бояхмедова). — 16 апрел дар Душанбе мулоқоти қонуншиносон ва ҳуқуқшиносони якчанд мамлакати аъзои Созмони амнияту ҳамкории Аврупо, аз ҷумла, Тоҷикистон, Қирғизистон, Финляндия, Норвегия, Лаҳистон, Фаронса ва Олмон баргузор гардид. Онҳо дар семинари минтақавие ширкат варзиданд, ки бо ташаббуси парлумони Тоҷикистон, Ассамблеяи парлумонии САҲА ва намояндагии он дар Тоҷикистон гузаронида шуд.  Дар ҷараёни мулоқот зикр карда шуд, ки шумораи коргарони муҳоҷири тоҷик дар мамлакатҳои хориҷӣ айни ҳол аз як миллион нафар ҳам зиёд аст. Қисми зиёди онҳо дар Федератсияи Русия кору зиндагӣ мекунанд. Аз рӯи маълумоти ғайрирасмӣ коргарони муҳоҷири тоҷик ҳар сол ба ватан баробари аз се ду ҳиссаи маблағи Маҳсулоти умумии дохилии кишвар пул мефиристанд.                Иштирокчиёни семинар инчунин масъалаҳои таъсири бӯҳрони молиявиро ба фаъолияти коргарони муҳоҷир, идораи ҷараёни муҳоҷирати коргаронро дар сатҳи минтақа ва тадбирҳои тақвияти муборизаро ба муқобили хариду фурӯши одамон муҳокима карданд.                Дар семинар роҳбари намояндагии САҲА дар Тоҷикистон Владимир Пряхин ширкат варзид.