СОҲИЛҲОИ ДАРЁИ ДУШАНБЕ ТОЗА КАРДА МЕШАВАД

               Душанбе. 13 апрел. «НИАТ «Ховар», Марзия Саидова).- «Тозагии соҳилҳои дарёи Варзоб дар ҳудуди пойтахт — покизагии виҷдони сокинонаш аст», таҳти чунин унвон 18 апрел дар Рӯзи пойтахт дар соҳилҳои дарёи Душанбе амалиёти тозагӣ гузаронида мешавад.              Назар ба иттилои котиби матбуотии раиси шаҳри Душанбе Шавкат Саидов, дар ин хусус раиси шаҳри Душанбе Махмадсаид Убайдуллоев қарор ба имзо расонд. Дар амалиёти тозагии соҳилҳои дарёи Душанбе дар қатори кормандони муассисаю идораҳои пойтахт, ҳамзамон сокинони маҳаллаю шаҳракҳое, ки дар соҳили дарёи Душанбе зиндагӣ менамоянд, ширкат меварзанд. Ин чорабинӣ бо мақсади тозаю озода нигоҳ доштани муҳити зист ва тарғиби тарзи ҳаёти солим андешида шудааст.