СОХТМОНИ ҚАСРИ ФАРҲАНГИ ШАҲРИ ПАНҶАКЕНТ АНҶОМ МЕЁБАД

                  Душанбе, 17 апрел. (АМИТ «Ховар», Таҳмина Ғоибназарова). — Муҳандиси маъмурияти сохтмони муассисаҳои ҳукуматии Дастгоҳи иҷроияи Президенти ҷумҳурӣ Набишо Бурҳонов ба АМИТ «Ховар» хабар дод, ки дар шаҳри Панҷакент сохтмони Қасри фарҳанги ба номи Абӯабдулло Рӯдакӣ рӯзҳои наздик ба охир мерасад. Қайд карда шуд, ки қасри фарҳанг дар арафаи таҷлили Рӯзи оштии миллӣ ба истифода дода хоҳад шуд. Қасри фарҳанги мазкур ба рӯйхати объектҳои идона дохил карда шудааст, гуфт Н.Бурҳонов.                  Дар шаҳри Панҷакент ба муносибати 1150 — солагии асосгузори адабиёти классикии тоҷик Абӯабдулло Рӯдакӣ осорхонаи Маликушшуаро ба куллӣ тармим карда шуд. Қасри фарҳанг дар наздикии ҳамин осорхона сохта мешавад. Бояд гуфт, ки сохтмони он ҳанӯз соли 1989 оғоз ёфта буд ва баъд қатъ гардид. Соли 2006 сохтмони Қасри фарҳанг давом дода, нақшаи сохтмони он то андозае тағйир ёфт.                  Дар ду ошёнаи он ба ҷои китобхона Мактаби ҳунарӣ ва синфхонаҳо барои машқи рақс ва устохонаҳои рассомӣ кушода мешаванд. Масоҳати умумии қаср 2900 метри мураббаъ мебошад. Қасри фарҳанг дорои толори тамошо барои 500 нафар, саҳнаи 13 метра, мактаби ҳунарӣ ва ғайра аст.                  Қисмати даромади он бо ранги тиллоӣ зарандуд карда шудааст. Барои сохтмони қаср 11 миллиону 800 ҳазор сомонӣ сарф шуд.Набишо Бурҳонов дар хотима зикр кард, ки Қасри фарҳанги шаҳри Панҷакент дар миқёси мамлакат ягона мебошад.