СОЛИ 2011 ҶТ КОМИЛАН АЗ БУНБАСТИ КОММУНИКАТСИОНӢ РАҲО МЕЁБАД?

                 Душанбе, 16 апрел.(АМИТ «Ховар», Марзия Саидова).- «То ҷашни 20-солагии истиқлолияти давлатӣ, Ҷумҳурии Тоҷикистон пурра аз бунбасти коммуникатсионӣ бароварда мешавад», чунин зикр кард Президенти Ҷумҳурии Тоҷикистон Эмомалӣ Раҳмон 15 апрел зимни паёми навбатии худ ба Маҷлиси Олии Ҷумҳурии Тоҷикистон.                  Дар робита дар зарфи се соли оянда дар соҳаи роҳсозии кишвар 2 миллиард сомонӣ маблағгузорӣ мегардад. Вобаста ба ин масъала Президенти мамлакат зикр кард, ки Ҳукумати ҷумҳуриро зарур аст, ки ҷиҳати бунёди инфраструктураҳое, ки Тоҷикистонро аз бунбасти коммуникатсионӣ мебароранд ва ба меъёрҳои байналмилалӣ мутобиқ гардонидану дар ҳолати хуб нигоҳ доштани онҳо, ҳамзамон ҷорӣ намудани механизмҳои худмаблағгузорӣ тадбирҳои зарурӣ андешад.                  Алҳол дар мамлакатамон ҳазору 200 километр роҳҳои мошингард, 14 километр нақбҳо, 93 пул ва 5 километр иншооти зиддитармавӣ бунёд ва таъмиру таҷдид шуда истодаанд. Дар соли равон яке аз лоиҳаҳои бузурги инветитсионии бахши комуникатсионии кишвар- азнавсозии роҳи мошингарди «Душанбе — Чанак», ки масофааш 350 километрро ташкил медиҳад, пеш аз мӯҳлат ба анҷом расонида мешавад.  Дар роҳи автомобилгарди 488 километраи «Душанбе — Ҷиргатол — Саритош» бошад корҳои бунёдию таҷдидӣ бо суръат идома дорад, ки он шаҳодати пешрафт ва дурнамои неки соҳа ва раҳоии мамлакат аз бунбасти коммуникатсионӣ аст.