ТАҶЛИЛИ РӮЗИ БАЙНАЛМИЛАЛИИ МУСОИДАТ БА БЕЗАРАР ГАРДОНДАНИ МИНАҲО ДАР ҶТ

                 Душанбе, 6 апрел (АМИТ «Ховар», Фарангис Раҳимова).- 4 апрел Рӯзи байналмиллалии мусоидат ба безараргардондани минаҳо таҷлил карда шуд. Дар ин рӯз таҳти васояти Ҳукумати Тоҷикистон дар «Кохи Ваҳдат» бахшида ба ин санаи муҳим ҷамъомади калон баргузор гардид. Дар ҷамъомад муовини раиси Комиссияи Ҳукумати ҶТ дар масъалаи амалӣ сохтани ҳуқуқи байналхалқии гуманитарӣ, вазири адлия Бахтиёр Худоёров сухан кард.                   Ҳамчунин намояндагони Муассисаи рушди СММ ва Созмони амнияту ҳамкории Аврупо дар ҷамъомади мазкур суханронӣ карданд. Ба иштирокчиёни ҷамъомад техника ва асбобу анҷоми безарар гардонидани минаҳо намоиш дода шуд. Меҳмонон ҳамчунин бо лавҳаҳо дар бораи дастовардҳои муассисаҳои огоҳкунӣ аз хавфи мина ва кӯмак ба осебдидагони минаҳо шинос гардиданд.                  Онҳо ба асарҳои тарбиягирандагони коллеҷи бадеии ш. Душанбе ба номи М. Олимов мароқ зоҳир намуданд, ки ба мавзӯи «Оқибатҳои ҳалокатовари таркиши мина ба ҳаёти одамон ва даъват ба мубориза ба муқобили мина» бахшида шуда буданд. Ҳар сол дар саросари ҷаҳон аз таркиши мина қариб 15-20 ҳазор нафар ҳалок ва ҳар 30 дақиқа як нафар маҷрӯҳ мегардад. Аз се як ҳиссаи онро кӯдакону наврасон ташкил медиҳанд. Мувофиқи маълумоти омор, дар Тоҷикистон аз соли 1992 то соли 2009 аз таркиши мина ва лавозимоти дигари ҷангии нотаркида қариб 800 нафар зарар дид, ки нисфи онҳо ҳалок шуда ва нисфи дигарашон маҷрӯҳ шуданд.                  Танҳо соли 2008 аз таркиши минаҳо ва лавозимоти дигари ҷангии нотаркида 4 нафар ҳалок ва 9 нафар маҷрӯҳ шуд.