ТАҶЛИЛИ РӮЗИ ИЛМ

               Душанбе, 20 апрел. (АМИТ «Ховар», Кристина Эрлих). — Дар Тоҷикистон Рӯзи илм ботантана таҷлил карда шуд. Ба ин муносибат дар Академияи илмҳои ҷумҳурӣ ҷамъомади серодам баргузор гардид. Дар он олимон, роҳбарони вазорату идораҳо ва намояндагони воситаҳои ахбори оммавӣ иштирок доштанд.               Раиси Академияи илмҳо Мамадшо Илолов зикр кард, ки олимони тоҷик дар соҳаҳои химия, математика, демография, биология ва соҳаҳои дигари илму иқтисод торафт бештар ба натиҷаҳои назаррас ноил мегарданд. Вай аз ҷумла, мулоқоти олимони академияро бо роҳбарияти КВД «ТАЛКО» мисол овард. Дар он масъалаи истифодаи ашёи хоми маҳаллӣ барои истеҳсоли алюминий муҳокима карда шуд. Қайд карда шуд, ки имсол ҷашнҳои рӯзи таваллуди баъзе олимони машҳуру барҷаста таҷлил карда мешаванд, ки дар пешрафти илми ҷаҳон саҳми калон гузоштанд.