ТАҶЛИЛИ РӮЗИ КАЙҲОННАВАРДОН

                Душанбе, 13 апрел. (АМИТ «Ховар», Наталя Михайлова). — 12 апрел дар бисёр мамлакатҳо Рӯзи кайҳоннавардон ботантана ҷашн гирифта шуд. Ба ин муносибат дар Пажӯҳишгоҳи астрофизикаи Академияи илмҳои Тоҷикистон низ ҷамъомади серодам баргузор гардид.  Дар он сухан дар бораи таърихи таҳқиқи фазои кайҳон, нақши олимон ва муҳаққиқони шӯравӣ дар ин соҳа ва иштироки олимони тоҷик дар пешрафти илми кайҳоншиносӣ рафт. Иштирокчиёни маҷлис хотираи аввалин кайҳоннавард Юрий Гагаринро пос доштанд.                   Номи Ю.Гагарин 12 апрели соли 1961 дар саросари ҷаҳон машҳур гардид. Вай нахустин сокини сайёра мебошад, ки бо киштии кайҳоннавардии «Восток» ба фазои назди Замин баромада, дар атрофи он давр зада буд. Парвози Гагарин як соату 48 дақиқа давом кард.                   Кайҳоннаварди нахустин ба бисёр мамлакатҳои ҷаҳон сафар карда буд. Ӯро дар ҳама ҷо ботантана пешвоз мегирифтанд. Гагарин орзу дошт, ки боз ба кайҳон парвоз карда, проблемаҳои мураккабтари илмиро таҳқиқ намояд.                   Вале Ю.Гагарин 27 марти соли 1968 зимни парвози озмоишӣ бо ҳавопаймоӣ МИГ — 15 ба фалокат дучор гардида ҳалок шуд. Ҳамроҳи ӯ лётчики озмоишгар, Қаҳрамони Иттиҳоди Шӯравӣ, полковник В.Серёгин низ ба ҳалокат расид. Сабаби аниқи ин воқеа то ҳол маълум нест.          Ю.Гагарин ҳамон вақт нав ба синни 34 — солагӣ расида буд. Ю.Гагарин хеле барвақт аз ҳаёт чашм пӯшида бошад ҳам, роҳи кайҳонро ба дигарон кушод.