ТАРАФДОРОНИ СОЗМОНҲОИ МУХОЛИФИН ДАР ҚИРҒИЗИСТОН ТАЪҚИБ КАРДА МЕШАВАНД

               Бишкек, 6 апрел. (АМИТ «Ховар» — ТРЕНД). — Қувваҳои мухолифи Ҳукумати Қирғизистон бори дигар изҳор намуданд, ки тарафдорони онҳо аз ҷониби мақомоти қудратии мамлакат таъқиб карда мешаванд. Аз ҷумла, ҳизби сотсиалистии «Ота — макон» вакили парлумон аз гурӯҳи ҳизби сотсиал — демократӣ Исо Омурқуловро таҳти ҳимоя қарор дод, ки нисбати он парвандаи ҷиноӣ кушода шудааст. И.Омурқулов барои гирифтани маблағи калони ришва гунаҳкор карда мешавад. Мухолифин ин иқдоми мақомоти мамлакатро таъқиботи сиёсӣ меноманд. Ба ақидаи роҳбарони созмони «Ота — макон» сабаби асосии кушодани парвандаи ҷиноӣ нисбати Исо Омурқулов мавқеи фаъолонаи ӯ мебошад. Номбурда инчунин, дар байни ҷомеа обрӯю эътибори калон дорад, вай яке аз сиёсатмадорони маъруфи мамлакат ба шумор меравад. Ба ақидаи мухолифин, таъқиботи сиёсии тарафдорони онҳо дар арафаи интихоботи президент суст намудани мавқеи мухолифин мебошад.