ТАШВИШИ ДУХТУРОНИ ВИЛОЯТИ СУҒД

                Душанбе, 30 апрел. (АМИТ «Ховар», Таҳмина Ғоибназарова). — Дар вилояти Суғд амалӣ сохтани тадбирҳои пешгирикунанда вобаста ба мушоҳида гардидани аломатҳои паҳншавии бемории зукоми мурғон дар минтақа аз нав давом дода мешавад. Сардухтури хадамоти байтории вилоят Муллоҷон Амирбеков ба АМИТ «Ховар» хабар дод, ки айни ҳол дар байни аҳолӣ, бозорҳо, муассисаҳои савдо ва корхонаю хоҷагиҳои мурғпарварӣ чораҳои пешгирикунанда андешида мешаванд.              Инчунин фаъолияти бунгоҳҳои санитарӣ дар гузаргоҳҳои сарҳади давлатӣ, майдони ҳавоӣ, истгоҳи марказии роҳи оҳан ва ҷойҳои дигар пурзӯр гардонда шуданд. Духтурон вазъи саломатии ҳамаи мусофирони аз мамлакатҳои дигар ба ҳудуди вилоят дохил гардидаро месанҷанд. Тибқи қарори 16 апрели соли равон қабулгардида ба ҳудуди вилоят ворид сохтани гӯшту тухми мурғ аз мамлакатҳое, ки дар онҳо бемории зукоми мурғон паҳн гардида буд, манъ карда шуд. Белгия, Гонконг, Ветнам, Норвегия, Олмон, Канада, Ҳиндустон ва Бангладеш аз ҷумлаи чунин мамлакатҳо мебошанд.              Ҳамаи ин тадбирҳо хусусияти муваққатӣ доранд. Онҳо баробари аз байн рафтани хавфи паҳн гардидани беморӣ бекор карда хоҳанд шуд, гуфт М.Амирбеков.