«ТОҶИКСУҒУРТА» ФАЪОЛИЯТАШРО ГУСТАРИШ МЕДИҲАД

                 Душанбе, 16 апрел. (АМИТ «Ховар», Ибодат Давлатова). — 16 апрели соли ҷорӣ дар Ширкати давлатии суғуртаи Тоҷикистон нишасти матбуотӣ оид ба ҷамъбасти фаъолияти семоҳаи якуми соли 2009 баргузор гардид.                 Дар он раиси Ширкати давлатии суғуртаи Тоҷикистон Аловиддин Сатторов баромад намуда, қайд кард, ки Ширкати мазкур фаъолияти кории худро бо ду шакли суғурта амалӣ мегардонад. Суғуртаи ихтиёрӣ ва суғуртаи ҳатмӣ. Имрӯз аз рӯи 36 намуди суғурта ба аҳолӣ хизмат расонида истодааст, ки аз онҳо 13 намудаш суғуртаи ҳатмӣ ва 23 намудаш суғуртаи ихтиёрӣ мебошанд.                  Дар семоҳаи аввали соли 2009 Ширкати давлатии суғуртаи Тоҷикистон ба шахсони ҳуқуқӣ ва воқеӣ ҳамагӣ 208,7 ҳазор шартномаи суғуртавӣ бастааст, ки аз ин 72,9 ҳазортош аз рӯи суғуртаи ҳатмӣ ва 135,9 ҳазортош аз рӯи суғуртаи ихтиёрӣ мебошад.                   Инчунин Ширкати давлатии суғуртаи Тоҷикистон ба шахсони ҳуқуқӣ ва воқеӣ, ки ба молу амвол ва саломатиашон осеб расидааст ба маблағи 1 миллиону 550,9 ҳазор сомонӣ ҷуброни зарар ҳақгузорӣ намудааст, ки ин нисбати маблағи дар семоҳаи авали соли сипаригардида ҳақгузоришуда 299.0 ҳазор зиёд мебошад.                   Дар фарҷом А. Сатторов ба саволҳои хабарнигорон посухҳои мушаххас дод.