«ТОҶИКСУҒУРТА» НИЗ БА ХУРОСОН КӮМАК КАРД

                         Душанбе, 30 апрел. (АМИТ «Ховар», Бекназари Абӯбакр). — Ширкати давлатии суғуртаи Тоҷикистон «Тоҷиксуғурта» баъди маҷлиси сайёр дар назди Сарвазири Ҷумҳурии Тоҷикистон Оқил Оқилов, ки 24 апрели соли ҷорӣ дар ноҳияи Хуросон нисбати дастгирӣ ва кӯмаки аҳолии зарардидаи ноҳия аз ҳодисаи табиӣ баргузор гардида буд, ба зарардидагоне, ки дорои полиси суғуртавӣ буданд ба маблағи 26 ҳазору 380 сомонӣ товони зарар пурра пардохт карда шуд.                          Инчунин, 30 апрел баъди анҷоми машварати дар назди Сарвари давлат Эмомалӣ Раҳмон баргузор гардида, Ширкати давлатии «Тоҷиксуғурта» иқдом гирифт, ки ба таври иловагӣ ба зарардидагони ноҳияи Хуросон аз офати табиӣ ба андозаи 240 ҳазор сомонӣ маблағ ҷудо намояд, ки ин маблағ худи ҳамон рӯз ба суратҳисоби шӯъбаи давлатии суғуртаи ноҳия гузаронида шуд.                         Ин маблағ барои дастгирӣ ва тармими 87 хонаҳои истиқоматӣ, ки аз офати табиӣ зарар дидаанд равона карда мешавад. Аз ин миқдор ба 22 адад хонаҳои истиқоматие, ки бо тамоми молу амволаш пурра зарар дидаанд, ба ҳар кадоми онҳо 5 ҳазор сомонӣ, ба маблағи умумии 110 ҳазор сомонӣ ҷудо шудааст.                          Ба 65 адад хонаҳои истиқоматие, ки қисман зарар дидаанд ба ҳар кадоми онҳо 2 ҳазор сомонӣ, ба маблағи 130 ҳазор сомонӣ дода мешавад.                          Бояд гуфт, ки ҷамъулҷамъ Ширкати давлатии «Суғуртаи Тоҷикистон» ба мардуми зарардидаи ноҳияи Хуросон ба маблағи 266 ҳазору 389 сомонӣ ёрии беғаразона ва пардохти суғуртавӣ расонид.