ТВ «САФИНА» БА НАВОРГИРИИ ФИЛМҲОРО ДАР БОРАИ ИМОМИ АЪЗАМ ШУРӮЪ МЕНАМОЯД

                  Душанбе, 14 апрел. (АМИТ «Ховар», Лутфия Эшонқулова).- Муассисаи давлатии «Телевизиони Сафина» дар семоҳаи аввали соли 2009 корҳои таблиғотиву ташвиқотиро дар самти сазовор истиқбол гирифтани 20-умин солгарди истиқлолияти давлатии Ҷумҳурии Тоҷикистон ва Соли бузургдошти мутафаккири барҷастаи Шарқ Имоми Аъзам ба таври васеъ ба роҳ монда, як қатор барномаҳои илмию адабӣ, фарҳангию маърифатӣ таҳия ва пешкаши бинандагон намуд. Дар ин бора дар нишасти матбуотӣ, ки имрӯз 14 апрел дар Душанбе доир гардид, директори ин муассиса Маҳмадсаид Пиров хабар дод. Ӯ қайд намуд, ки дар ин давра яке аз фармонҳои таърихии Президенти ҶТ Эмомалӣ Раҳмон «Дар бораи вокуниши шахсони мансабдор ба маводҳои танқидӣ ва таҳлилии воситаҳои ахбори омма» ба тавсиб расид ва дар ин радиф, теъдоди гузоришҳои таҳлиливу танқидӣ дар барномаҳои иттилоотӣ бештар гардид, ки ба бархе аз онҳо масъулини идораҳои давлатӣ вокуниш нишон доданд.                 Ҳамчунин, зикр гардид, ки аз моҳи январ то моҳи март кормандони идораи таҳияи филмҳо ва дубляжи муассиса 6 филми бадеӣ аз ҷумла, «Шаби тулонӣ», «Шикасти афғонӣ», «Паланг мехоҳем», «Об аз куҷо меояд?» ва 12 филми мустанадро тарҷума ва дубляж карданд.Дар ин муддат банаворгирии филмҳои телевизионии «Пуштаи хандакпеч» ва «Чӯҷаҳо» аз ҷониби коргардонҳо Саид Қодирӣ ва Юнус Юсуфов анҷом ёфта, пешкаши тамошобинон гардид.                 Маҳмадсаид Пиров дар бораи нақшаҳои фаъолияти телевизион сухан карда, гуфт, ки дар семоҳаи дуюм бахшида ба Соли Бузургдошти Имоми Аъзам банаворгирии филми ҳунарии «Фақеҳи тамоми давру замонҳо» ва филми телевизионии «Кӯҳистонӣ» оғоз меёбад. Рӯзҳои наздик намояндагии муассиса дар навоҳии водии Рашт ба кор шурӯъ мекунад.  Қобили зикр аст, ки дар ин семоҳа дар асоси Оинномаи муассиса намояндагиҳои «Телевизиони Сафина» дар вилоятҳои Суғд ва Хатлон ба филиал табдил дода шуданд.