ВАЗИРОНИ МОЛИЯИ ИДМ ТАЪСИРИ БӮҲРОНИ МОЛИЯРО МУҲОКИМА НАМУДАНД

                  Душанбе, 7 апрел. (АМИТ «Ховар», Бекназари Абӯбакр). — Вазири молияи Ҷумҳурии Тоҷикистон Сафаралӣ Наҷмиддинов дар шаҳри Москва дар машварати вазирони молияи мамлакатҳои Иттиҳоди Давлатҳои Мустақил иштирок намуд, ки дар он ҳамчунин вазирони молияи Россия, Украина, Белорус, Казоқистон, Қирғизистон, Туркманистон, Озорбойҷон, Арманистон ва Молдова ширкат доштанд.                  Дар раёсати котиботи вазорати молияи ҷумҳурӣ ба мухбири АМИТ «Ховар» гуфтанд, ки дар машварат масъалаҳои бахши молияву бонкӣ дар кишварҳои ИДМ, таъсири бўҳрони ҷаҳонии молиявӣ, роҳҳои бартараф кардани он ва дар амал тадбиқ намудани чорабиниҳои зиддибўҳронӣ мавриди баррасӣ қарор дода шуданд.                 Оид ба васеъ намудани ҳамкориҳои минтақавӣ дар доираи Иттиҳоди Давлатҳои Мустақил, дар ҷавоб ба бўҳрони молиявӣ таклифҳо пешниҳод карда шуд. Бахусус, зарурияти васеъ намудани муносибатҳои иқтисодӣ-тиҷоратӣ ва умуман гардиши мол байни мамлакатҳо, зарурияти аз байн бурдани ҳар гуна садди маъмурӣ, кушодани роҳ ба бозор ва захираҳои молиявӣ, таъмини озоди сармоя, қувваи корӣ ва истифодаи васеи асъорҳои миллии мамлакатҳои ИДМ дар амалиётҳои бонкӣ аз ҷониби вазирон пешниҳод карда шуд.                 Қайд карда шуд, ки дар шароити таъсири манфии бўҳрони ҷаҳонии иқтисодӣ барои мамлакатҳои СНГ таҳия ва амалӣ намудани маҷмўи чораҳо оид ба осон гардидани роҳи баровардани истеҳсолкунандагони моли ИДМ, ба бозорҳои мамлакатҳои аъзо ва ба бозорҳои ҷаҳонӣ, инчунин паст кардани монеаҳои гумрукӣ ва тараққӣ додани долонҳои транзитӣ.                Ба ғайр аз ин, масъалаҳои сиёсати оқилонаи макроиқтисодӣ, маҳдуд намудани касри буҷет, тавваруми мўътадил ва қурбӣ назоратшавандаи асъорҳои миллӣ дар маркази таваҷҷўҳи машварат қарор дошт.                 Дар машварат ба масъалаҳои таъсис додани Маркази ягонаи молиявӣ оид ба ташаккули механизми ба таври таъҷилӣ аҳамият додани давлатҳои аъзои ЕврАзЭС ба таҳдиди ташаннуҷи молиявӣ дар ҳолати ноустуворӣ дар бозорҳои молиявӣ ва фондии ҷаҳон, низ диққат дода шуд. Бинобар ин масъалаи таъсис додани Фонди зиддибўҳронии ЕврАзЭС баррасӣ карда шуд, ки барои иштирок дар он Россия, Қазоқистон ва Арманистон изҳори хоҳиш намуданд.               Тоҷикистон низ оиди иштирок дар фонди мазкур пешниҳод намуд, ки барои мамлакатҳои даромадашон паст оид ба дастгирии барномаҳои зиддибўҳронӣ дар самти алоҳида лоиҳаҳо ҷудо карда шавад. Яке аз натиҷаҳои муҳим, ки дар машварат ба даст омад, ин ба мувофиқа омадани вазирони молия ва раисони Бонкҳои марказии мамлакатҳои Иттиҳоди Давлатҳои Мустақил, оид ба ҳамоҳангсозии фаъолият бар зидди ҷараёни бўҳрон, яъне амалӣ намудани сиёсати дурусти пуливу қарзӣ ва буҷету андоз, ба ғайр аз ин андешидани чораҳо оид ба ҳифзи бозорҳо, сиёсати муҳоҷират, ки бўҳрон боиси кам гардидани ҷойҳои корӣ барои муҳоҷирони меҳнатӣ дар Россия гардид, ба шумор меравад.              Инчунин пешниҳод оиди такмил додани сохтори институтҳои байналмилалии молиявӣ, асъори байналмилалӣ, нигоҳ доштани захираҳои тиллову асъорӣ мавзўи муҳокима қарор дода шуд.              Дар анҷоми машварат вазирони молияи давлатҳои аъзои Иттиҳоди Давлатҳои Мустақилро Президенти Федератсияи Россия Д.А.Медведев қабул карда, қайд намуд, ки мубодилаи афкор ва пешниҳодоти дар машварат таҳия гардида, нисбат ба чораҳо оиди паст кардани таъсири бўҳрони молиявии ҷаҳонӣ дар арафаи саммити бист давлати бузурги дунё дар Лондон хеле муҳим мебошад.