12 ОМӮЗГОР БА ЛАҲИСТОН МЕРАВАНД

                     Бадахшон, 8 май. (АМИТ «Ховар», Лутфишо Додо).- Созмони ҷаҳонии Лаҳистони «Партнёр» ба хотири таъмири 2 бинои мактаби ҳамагонии ВМКБ 10 ҳазор евро ҷудо намудааст. Тавре аз Раёсати маорифи вилоят хабар доданд, созмони номбурда инчунин мақсад дорад, ки дар баланд бардоштани маҳорати касбии омӯзгорони фанҳои табиатшиносию дақиқ ҳиссагузорӣ намояд. Тибқи маслиҳати қаблӣ имрӯзҳо 24-нафар беҳтарин омӯзгорони фанҳои дақиқу табиатшиносӣ омодаи сӯҳбат бо намояндагони ин созмонанд,- Рӯзҳои наздик намояндагони «Партнёр» вориди Бадахшон гардида, баъди сӯҳбат 12-нафар беҳтаринҳоро интихоб мекунанд. Ин нафарон дар Лаҳистон дар курси вижа маҳорати касбии худро баланд мебардоранд.