ҲАФТАИ ҶАВОНОН ДАР ПОЙТАХТ

                        Душанбе, 20 май.(АМИТ «Ховар», Марзия Саидова).-Дар бораи баргузории «Ҳафтаи ҷавонони пойтахт» Раиси шаҳри Душанбе Маҳмадсаид Убайдуллоев қарор имзо намуд. Тибқи он нақша- чорабиниҳои Мақомоти иҷроияи ҳокимияти давлатӣ дар шаҳри Душанбе ҷиҳати дар сатҳи баланд гузаронидани Рӯзи ҷавонони Тоҷикистон, ки ҳамасола 23 май таҷлил мегардад, таҳррезӣ шуд.                      Дар асоси он мусобиқаи футбол байни кормандони сохторҳои пойтахт барои дарёфти «Ҷоми шаҳрдорӣ», озмуни умумишаҳрии «Манзараҳои шаҳри ман» байни рассомони ҷавони пойтахт, конфронси илмӣ- назариявӣ бо иштироки олимон ва муҳаққиқони ҷавон дар мавзӯи «Моҳияти бузургдошти Соли Имоми Аъзам ва устувории андешаҳои солими ҳамзистии мусолиматомез» гузаронида мешавад. Инчунин, 23 май дар боғҳои фарҳангу фароғатии ба номи Айнӣ, «Кӯли ҷавонон», «Дӯстии халқҳо» ва майдони «800 -солагии Москва» барномаҳои фарҳангӣ ва сайругашти идона баргузор мешаванд.