ҲАМКОРИИ ИСТИХРОҶКУНАНДАГОНИ НАФТУ ГАЗИ ТОҶИКИСТОН ВА РУСИЯ

                        Душанбе, 26 май. (АМИТ «Ховар», Кристина Эрлих). — Дар Раёсати умумии геологияи назди Ҳукумати Ҷумҳурии Тоҷикистон машварати илмию техникӣ баргузор гардид. Дар он барномаи таҳқиқи технологии мавзеи Сариқамиш дар минтақаи наздисарҳадии Тоҷикистону Афғонистон муҳокима ва тасдиқ карда шуд. Барномаи мазкурро Ҷамъияти саҳомии «Газпром зарубежнефтегаз» ва Ҷамъияти саҳомии «Саратовнефтегеофизика» — и Федератсияи Русия таҳия намудаанд.                        Дар машварат аз Тоҷикистон сардори Раёсати умумии геология Азиз Иброҳим, муовинони ӯ ва мутахассисони раёсат, аз ҷониби Русия муовини директори генералӣ, саргеологи Ҷамъияти саҳомии «Газпром зарубежнефтегаз» Вадим Рибалченко, роҳбари намояндагии Ҷамъияти саҳомии мазкур дар Тоҷикистон Сергей Туманов, муовини ӯ, мутахассисони Ҷамъияти саҳомии «Саратовнефтегеофизика» ва мутахассисони дигар иштирок доштанд.                        Мухбири АМИТ «Ховар» хабар медиҳад, ки барои ҷустуҷӯи нафту газ дар мавзеи Сариқамиш асбобу анҷом ва таҷҳизоти навтарин истифода бурда мешавад. Асбобу анҷом ва таҷҳизот ба Тоҷикистон аз шаҳрҳои Саратов, Екатеринбург, инчунин, аз Ҷумҳурии Қирғизистон оварда хоҳад шуд. Айни ҳол дар ин ҷо сохтани роҳҳои мошингард давом дорад. 15 июн дар мавзеи Сариқамиш шаҳраки муваққатӣ бунёд карда мешавад.  Чуқурии чоҳҳое, ки дар ин ҷо канда мешаванд, то ба 6 — 7 километр мерасанд.