ҲАМКОРИИ МАМЛАКАТҲОИ ИДМ ДАР СОҲАИ ИТТИЛООТ

                      Душанбе, 7 май. (АМИТ «Ховар», Фарангис Раҳимова ). — Рӯзҳои 6 — 7 май дар Минск дар ҷараёни намоишгоҳи 13 — уми байналхалқии махсусгардонидашуда таҳти унвони «Воситаҳои ахбори оммавии Белорусия» дар мавзӯи «Воситаҳои ахбори оммавӣ дар давраи бӯҳрони ҷаҳонии иқтисодӣ ва роҳҳои таъмини фаъолияти онҳо» мулоқоти чоруми байналхалқӣ баргузор гардид. Онро Вазорати иттилооти Белорусия, Кумитаи доимии давлати иттифоқӣ, Иттифоқи журналистони Белорусия бо кӯмаки Вазорати корҳои хориҷии Белорусия, Кумитаи иҷроияи ИДМ, Дафтари САҲА дар Минск ва Академияи телевизион ва радиои Евразия ташкил намуданд.                       Мувофиқи дастури сарони Ҳукуматҳои ИДМ, дар бобати бартараф сохтани оқибатҳои манфии бӯҳрон ва таъсири он ба соҳаи иттилоот пешниҳодҳо таҳия ва баррасӣ карда шуданд. Тибқи нақша дар доираи ИДМ таҳияи барномаи таъминоти бештари бозори дохилӣ бо маводи озуқаи истеҳсоли маҳаллӣ, тағйир додани самтҳои фаъолияти бонкҳо дар бобати гузоштани маблағ ба соҳаҳои сердаромад ва маҳдуд сохтани хориҷ гардидани сармоя аз қаламрави давлатҳои Иттиҳод пешбинӣ карда мешавад.                        Давлатҳои ИДМ барои ҳалли проблемаҳои инъикоси фаъолияти давлатҳояшон ҳамкориро дар соҳаи иттилоот вусъат мебахшанд.Бо ин мақсад аввали ҳамин сол системаи иттилоотии байнидавлатӣ ташкил карда шуд, ки ба туфайли он муассисаҳои радиою телевизиони мамлакатҳои Иттиҳод барномаҳои ҷолиби диққатро мубодила менамоянд.22 май дар шаҳри Остона маҷлиси Шӯрои сарони ҳукуматҳои Иттиҳод баргузор мегардад. Дар он нақшаи тадбирҳои аввалиндараҷа дар соҳаи ҳамкории гуманитарӣ барои солҳои 2009 — 2010 тасдиқ карда мешавад. Боби алоҳидаи нақшаи мазкур ба ҳамкорӣ дар соҳаи иттилоот бахшида шудааст.                         23 апрел дар Минск машварати роҳбарону намояндагони агентиҳои иттилоотии давлатҳои ИДМ баргузор гардид. Иштирокчиёни он бори дигар зарурати мубодилаи доманадори иттилоотро дар соҳаҳои гуногун таъкид намуданд.