ҲОҶӢ ГУНАҲКОР ДОНИСТА ШУД

                       Мӯъминобод, 20 май. (АМИТ «Ховар», Сулаймон Холов).- Рӯзи 7 майи соли 2009 дар ҷамоати деҳоти Зиракии ноҳияи Кӯлоб таҳти раисии Асламшо Холов суди сайёр баргузор шуд, ки парвандаи маъмурии пешниҳод намудаи бахши танзими анъана ва ҷашну маросимҳои дастгоҳи раиси шаҳри Кӯлоб нисбати шаҳрванд Сафаралӣ Самадов бо моддаи 481-и кодекси маъмурии Ҷумҳурии Тоҷикистонро баррасӣ намуд.                      Ҳангоми мурофиа қайд гардид, ки шаҳрванд Сафаралӣ Самадов дар хонааш воқеъ дар деҳаи Ҳакимободи ҷамоати деҳоти Зиракии ноҳияи Кӯлоб маъракаи «Ҳоҷиталбон» гузаронида, бо ин амалу кирдораш қисми 2-юми моддаи 12-и қонуни Ҷумҳурии Тоҷикистон «Дар бораи танзими анъана ва ҷашну маросимҳо дар Ҷумҳурии Тоҷикистон»- ро вайрон намудааст.                      Дар мурофиаи судӣ гуноҳи Самадов Сафаралӣ пурра исботи худро ёфта, ӯро мувофиқи моддаи 481-и кодекси ҳуқуқвайронкунии маъмурии Ҷумҳурии Тоҷикистон ба андозаи 2500 сомонӣ ҷарима намуданд.