ҶИА ДАСТОВАРДҲОИ ИҚТИСОДИАШРО ДАР БОРБАД НАМОИШ МЕДИҲАД

                        Душанбе, 21 май.(АМИТ «Ховар», Марзия Саидова).-Беш аз 150 ширкати саноатии хусусии Ҷумҳурии Исломии Афғонистон дар нахустин намоишгоҳи пешрафтҳои иқтисодии Афғонистон, ки аз 4 то 6 августи соли равон дар «Кохи Борбад»-и Душанбе баргузор мешавад, ширкат менамоянд. Дар ин хусус, ба АМИТ «Ховар», атташеи тиҷоратии Сафорати Афғонистон дар Тоҷикистон Наҷибулло Раҳимӣ иттилоъ дод.Ҳадафи асосии баргузории намошгоҳ ба роҳ мондан ва тақвияти ҳамкориҳои мутақобилан судманди иқтисодию тиҷоратӣ, табодули таҷриба ва ба имзо расонидани қарордодҳои ҳамкорӣ байни тоҷирони ду кишвари ҳамҷавор аст. Дар радифи намошгоҳ анҷумани бозаргонони Тоҷикистону Афғонистон баргузор мегардад. Дар он масъалаҳои тавсеаи ҳамкорӣ дар бахши тиҷорат баррасӣ мешаванд. Намоишгоҳ бо ибтикори Палатаи савдо ва саноати Тоҷикистон ва утоқи тиҷоратӣ ва саноъеи дастии Афғонистон ташкил карда шуда, маҳсулоти саноатӣ, хӯрока, бофандагӣ ва саноати дастӣ ба намоиш ва фурӯш гузошта мешаванд.                       Наҷибулло Раҳимӣ афзуд, ки тӯли солҳои охир ҳамкориҳои ду давлати ҳамсоя дар бахши тиҷорат густариш меёбад, ки он ба беҳдошти вазъи иқтисодию иҷтимоии Тоҷикистону Афғонистон нақши муассир мегузорад. Дар ин муддат ҳаҷми мубодилаи мол байни ду кишвар афзоиш ёфта, танҳо дар соли 2008 -ум 92 миллион долларро ташкил дод. Хусусан, дар тавсеаи ҳамкории иқтисодии ду кишвар пули стратегии дар минтақаи Панҷи -Поён ва Шерхонбандарбуда, нақши муҳим мебозад. Н. Раҳимӣ мегӯяд, ки тавассути ин пул дар як шабонарӯз 80-90 мошин бо маҳсулоти гуногун аз Афғонистону Покистон вориди Тоҷикистон мегарданд. Асосан аз Афғонистон ба Тоҷикистон маҳсулоти хӯрока ва зироатӣ ва аз Тоҷикистон ба Афғонистон алюминӣ, чарму пӯст ва дигар навъи маҳсулот интиқол дода мешавад. Ҳамзамон, атташеи тиҷоратии Сафорати Афғонистон гуфт, ки дар минтақаҳои наздисарҳадии Тоҷикистону Афғонистон, аз ҷумла дар ноҳияҳои Дарвозу Ишкошим ва шаҳри Хоруғ бозорчаҳои марзӣ фаъолият менамоянд, ки онҳо дар таъмини аҳолии минтақаҳои наздисарҳадӣ бо маводи ниёзи аввал ва дигар маҳсулот саҳми назаррас доранд. Алҳол байни ду кишвар беш аз 10 корхонаи муштарак дар бахшҳои сохтмон, саноати сабук, мусофиркашонию транзитӣ фаъолияти пурсамар доранд.