ҶУНБИШИ «ТОЛИБОН» ЭРОН ВА ТОҶИКИСТОНРО ОГОҲ МЕКУНАД

                         Душанбе, 23 май. (АМИТ «Ховар» — Би — Би — Си). — Роҳбарияти Ҷунбиши «Толибон» Эрон ва Тоҷикистонро огоҳ намуд, ки ҳамкории онҳо бо ИМА ва дастгирии маъракаи ҳарбии муштараки муқобили «Толибон» барои онҳо оқибатҳои ҷиддӣ хоҳад дошт. Изҳороти мазкур ба воситаи яке аз шабакаҳои телевизионии арабӣ пахш карда шуд. Қиёфаи қироаткунандаи изҳоротро шинохтан мумкин набуд. Ӯ худро Абдулло Васай Оғоҷон Муттасим номид, ки яке аз роҳбарони «Толибон» буда, ба кумитаи сиёсии он дар Афғонистон роҳбарӣ мекунад.                       «Ба мо хабар расид, ки мақомоти Тоҷикистон розӣ шудаанд, ки ИМА ва НАТО қаламрави онро барои интиқоли мол ба Афғонистон истифода баранд. Ин чунин маъно дорад, ки онҳо ба истифодаи зӯрӣ ва аслиҳа нисбати ислом ва мамлакати ҳамсоя шарик мебошанд», — гуфт Муттасим.                       Намояндаи «Толибон» Ҳукумати Тоҷикистонро даъват кард, ки аз расондани кӯмак ба маъмурияти Амрико даст кашад. Муттасим зикр накард, ки агар Душанбе ҳамкориро бо мамлакатҳои Ғарб дар масъалаи Афғонистон давом диҳад, чӣ гуна тадбирҳо андешида мешаванд.                       Мақомоти расмии Душанбе хабарҳоро дар бораи изҳороти Муттасим шарҳ намедиҳанд. Намояндаи Вазорати корҳои хориҷии Тоҷикистон зикр намуд, ки Ҳукумати мамлакат ба ҳар гуна изҳороти ғайрирасмӣ вокуниш нишон намедиҳад. Бо вуҷуди ин мақомоти дахлдор чунин изҳоротро ба қайд гирифта, тадбирҳои зарурӣ меандешанд.Ҳукумати Тоҷикистон қабл аз ин розӣ шуда буд, ки ИМА қаламрави онро барои интиқоли молҳои ғайринизомӣ ба Афғонистон истифода барад. Маъмурияти Амрико дар ин масъала бо Маскав ва Тошканд ҳам мувофиқа ба даст оварда буд.