125 ҲАЗОР СОМОНӢ БАРОИ ЗАРАРДИДАГОНИ НОҲИЯИ ХУРОСОН

                         Душанбе, 21 май. (АМИТ «Ховар», Фарангис Раҳимова).- Ҷумҳурии Федеративии Олмон бо воситаи Ҷамъияти Ҳамкории Техникии ин мамлакат барои расонидани кӯмак ба зарардидагони боришҳои тӯлонӣ дар ноҳияи Хуросон 125 ҳазор сомонӣ ҷудо намуд.                        Маблағи мазкур ба тариқи илова ҷудо карда, ба ҳисоби намояндагии Кумитаи байналхалқии Салиби Сурх дар Тоҷикистон гузаронида шуд. Маблағи кӯмак барои харидану тақсим кардани асбобу анҷоми зарурии рӯзгор сарф карда мешавад.                        Қайд кардан зарур аст, ки рӯзи 21 апрел дар 3 қишлоқи ноҳияи Хуросон 60 хона дар натиҷаи омадани сел вайрон шуд. Беш аз 1500 одам зарар дид. Рӯзи 14 май боз сел омад ва 120 хонаро вайрон кард.                     Ҳукумати Ҷумҳурии Федеративии Олмон имконияти ҷудо кардани маблағро барои барқарорсохтани хонаҳои харобгардида баррасӣ менамояд.