500 ДОНИШҶӯИ ТОҶИК ДАР «АЛ-АЗҲАР»-И ҚОҲИРА

                     Душанбе, 12 май.(АМИТ «Ховар», Марзия Саидова).-Намояндагони Донишкадаи исломии Тоҷикистон ба номи Имоми Аъзам Абӯҳанифа Нӯъмон ибни Собит аз Ҷумҳурии Мисри Араб баргаштанд.                     Онҳо дар Қоҳира бо ректори донишгоҳи исломии «Ал- Азҳар» профессор Аҳмад ат- Тайиб мулоқот карда, масъалаҳои барқарор намудани робитаҳои мустақими ҳамкорӣ байни ду муассисаи таълимии исломиро мавриди баррасӣ қарор доданд.                    Мусоҳибон аз иқдомоти Президенти Ҷумҳурии Тоҷикистон Эмомалӣ Раҳмон, ки зарфи солҳои охир дар бахши дини мубини ислом ва бузургдошти арзишҳои исломӣ пайгирӣ шудааст, изҳори хушнудӣ намуданд.                   Назар ба иттилои ректори донишкадаи исломии Тоҷикистон Абдуҷалол Ализода, дар мулоқот масъалаҳои тақвияти ҳамкорӣ дар бахши табодули таҷриба, ташкили курсҳо барои устодону донишҷӯён, таъмини донишкадаи исломии Тоҷикистон бо адабиёти динӣ-мазҳабӣ ва воситаҳои таълимӣ баррасӣ шуданд. Зикр шуд, ки ҷиҳати тақвияти робитаҳо дар ин самт санади ҳамкории дуҷониба ба имзо мерасад, ки он аз сӯйи Тоҷикистон пешниҳод шудааст.                 Ҳамзамон, намояндагони Тоҷикистон бо Имоми Акбар шайхи Азҳари Шариф доктор Муҳаммад Сайид Тантовӣ дидору мулоқот намуданд.                  Бояд тазаккур дод, ки донишгоҳи «Ал-Азҳар» яке аз донишгоҳҳои бонуфузу қадимаи олами ислом ба шумор рафта, он соли 988 аз ҷониби сулолаи Фотимӣ ба шарафи духтарони паёмбари ислом Муҳаммад (С) Фотима ва Зӯҳро бунёд карда шудааст. Собиқ  Президенти Ҷумҳурии Мисри Араб Ҷамол Абдулнаср соли 1961 ба фаъолияти донишгоҳ тағйирот дароварда, дар он баъзе фанҳои дунявӣ, аз ҷумла ҳуқуқ, тиб ва кишоварзиро ворид сохт. Алҳол дар донишгоҳи бонуфузи қадимаи «Ал-Азҳар» ҳудуди 500 донишҷӯи тоҷик дар бахшҳои гуногун таҳсил менамоянд.