АМАЛИЁТИ ТЕРРОРИСТӢ ДАР АНДИҶОН

                         Тошканд, 27 май. (АМИТ «Ховар» — Лента. ру ). — Намояндаи Прокуратураи генералии Ӯзбекистон хабар дод, ки таркишро дар шаҳри Андиҷон як нафар террористи фидоӣ ба амал овардааст. Алҳол шахсияти террорист муайян карда мешавад. Аз рӯи хабарҳои расида, дар натиҷаи таркиш як корманди милиса ҳалок ва чанд нафари дигар маҷрӯҳ шудаанд. Ин воқеа 26 май тақрибан соати 14 бо вақти маҳаллӣ рух дод. Қабл аз ин хабар дода шуда буд, ки баъди таркиш ба шаҳри Андиҷон қисмҳои ҳарбӣ ва техникаи зиреҳпӯш дароварда шуданд. Кӯчаҳоро дастаҳои милиса ва ҳарбиён посбонӣ мекунанд.                      Аз рӯи хабари дигар, гурӯҳи калони ҷангиён аз қаламрави Ҷумҳурии Қирғизистон ба вилояти Андиҷон зада даромадаанд. Онҳо дар даромадгоҳи шаҳри Хонобод ба посгоҳи милиса ҳуҷум оварданд. Дар натиҷа як корманди милиса ва яке аз ҳуҷумкунандагон маҷрӯҳ гардиданд.                       Баъдан хабар расид, ки шаби 26 май силоҳбадастон дар шаҳри Хонобод ба бинои Шӯъбаи корҳои дохилӣ ва Хадамоти амнияти миллӣ ҳуҷум овардаанд. Ҳуҷумкунандагон аъзои Ҷунбиши исломии Ӯзбекистон мебошанд.                      Расонаҳои гурӯҳӣ хабар медиҳанд, ки айни ҳол бо шаҳри Хонобод тамоми воситаҳои алоқа баста шудаанд. Инчунин, гузаргоҳҳои сарҳадии байни Ӯзбекистону Қирғизистон маҳкам карда шудаанд.