АСАРҲОИ КӮДАКОНИ РАССОМИ ДАВЛАТҲОИ АЪЗОИ ШОС

                       Душанбе, 21 май. (АМИТ «Ховар», Лутфия Эшонқулова).- 22 май бо дастгирии Вазорати фарҳанги ҶТ ва Котиботи ташкилоти ҳамкории Шанхай (ШОС) дар Коллеҷи ҷумҳуриявии рассомии ба номи М. Олимов намоиши байналмилалии расмҳои кўдаконаи «Кўдакон расми афсонаҳоро мекашанд» ифтитоҳ мегардад. Дар он 200 номгўи асарҳои кўдакони рассоми шаш давлати аъзои ШОС (Қазоқистон, Қирғизистон, Хитой, Русия, Тоҷикистон ва Ўзбекистон)ї ба маърази тамошо гузошта мешаванд.                      Дар ифтитоҳи намоиш намояндаҳои ташкилотҳои давлатӣ ва ҷамъиятӣ, корпусҳои дипломатии муқими шаҳри Душанбе, устодону донишҷўёни муассисаҳои таълимӣ ва воситаҳои ахбори омма ширкат меварзанд. Дар кори намоиш муовини котиби генералии ШОС Владимир Захаров низ иштирок хоҳад кард.                      Дар доираи он барои тамошобинон хонандагони мактабҳои миёнаи махсуси мусиқии ба номи З. Шаҳидӣ, санъати ба номи М. Атоев ва Коллеҷи ҷумҳурияии хореографии ба номи М. Собирова бо барномаи консертии хотирмон баромад мекунанд.Тавре ба мухбири АМИТ «Ховар» дар маркази матбуоти Вазорати фарҳанг хабар доданд, мақсад ва вазифаҳои ин намоиш таъмини сулҳ дар минтақа, тарғиби ғояҳои ватандўстӣ, эҳтироми фарҳанги якдигар, ба ин роҳ мустаҳкамгардонии алоқаи байни давлатҳо мебошад.                      Бояд ёдовар шуд, ки намоишномаи «Кўдакон расми афсонаҳоро мекашанд» бори аввал соли 2005 дар шаҳри Пекин баргузор гардида, дар он 800 номгўи асарҳои рассомӣ ба намоиш гузошта шуда буд.                     Муаллифони асарҳои беҳтарин бо ифтихорномаҳо қадрдонӣ карда мешаванд.