БОНКИ МИЛЛИИ ШВЕЙТСАРИЯ БОНКИ МИЛЛИИ ТОҶИКИСТОНРО ДАСТГИРӢ МЕНАМОЯД

                          Душанбе, 28 май. (АМИТ «Ховар», Фарангис Раҳимова). — Президенти Ҷумҳурии Тоҷикистон Эмомалӣ Раҳмон 27 май бо раиси Бонки миллии Швейтсария Жан Пер Ротта мулоқот кард.                          Раиси Бонки миллии Швейтсария баъди анҷоми мулоқоташ бо Сарвари давлат зимни сӯҳбат бо хабарнигорон изҳор намуд, ки Бонки миллии Швейтсария бештар аз даҳ сол боз бо Бонки миллии Тоҷикистон ҳамкорӣ дорад. Ман ба Президент роҷеъ ба масъалаҳое маълумот додам, ки онҳоро ҳамроҳи раиси Бонки миллии Тоҷикистон мавриди баррасӣ қарор додем. Мо бо Тоҷикистон дар се соҳа — таълим додан ва омӯхтани кормандони бонкҳо, ба онҳо омӯхтани сиёсати пул ва аз худ кардани илми информатика дар соҳаи молия самарабахш ҳамкорӣ карда метавонем, гуфт Ж. П.Ротта.                         Қайд карда шуд, ки дар давоми даҳ соли охир дар соҳаи молияи Тоҷикистон ва фаъолияти бонкҳои он тағйироти ҷиддии мусбат ба амал омадаанд. Мо дар оянда низ кӯшиш хоҳем кард, ки ба Бонки миллии Тоҷикистон кӯмаки зарурӣ расонем. Раиси Бонки миллии Тоҷикистон Шариф Раҳимзода ба ман хабар дод, ки парлумони мамлакат дар бораи Бонки миллӣ қонун қабул кардааст. Қабули чунин қонун самаранокии фаъолияти Бонки миллиро афзунтар мегардонад, гуфт дар хотима раиси Бонки миллии Швейтсария.