БОЗОРҲОИ ШАҲР БА ТАЛАБОТИ СТАНДАРТИ ДАВЛАТӢ ҶАВОБГӮ НЕСТАНД

                        Душанбе, 13 май. (АМИТ «Ховар», Кристина Эрлих).- «Имрӯз ягон бозори шаҳр ба талаботи стандартӣ ҷавоб дода наметавонад, ҳамаи онҳо дар шароити ногувори санитарӣ қарор доранд»,- дар ин бора дар маҷлиси Агентии «Тоҷикстандарт» муовини раиси ҳукумати шаҳри Душанбе Абдувохид Шералиев сухан ронд.                        Дар маҷлис директори Агентии «Тоҷикстандарт» Давлаталӣ Ҳотамов, кормандони масъули агентӣ, муовинони раисони 4 ноҳияи шаҳр ва роҳбарони бозорҳо иштирок карданд.                       Д. Ҳотамов қайд намуд, ки «вазъи имрӯзаи бозорҳо ташвишовар аст. Сифати маҳсулот ва хизматрасонӣ — яке аз проблемаҳои ҷиддии бозорҳои Тоҷикистон аст. Кормандони агентӣ аз аввали сол то имрӯз фаъолияти 293 бозорро тафтиш карданд. Маълум гардид, ки қариб ҳар рӯз ҳуқуқи истеъмолкунандагон поймол мегардад ва ин дар бораи он шаҳодат медиҳад, ки онҳо ҳуқуқҳои худро намедонанд».                     Дар рафти маҷлис сардори идораи назорати савдои «Тоҷикстандарт» Нарзулло Шарипов иштирокунандагонро бо камбудиҳо дар соҳаи хизматрасонӣ ва нигоҳдории мол дар бозорҳои «Шоҳмансур» ва «Маяковский» шинос кард. Ба роҳбарони ин бозорҳо супориш дода шуд, ки камбудиҳои ҷойдоштаро дар рӯзҳои наздик бартараф созанд.                      Дар охир Д. Ҳотамов дар бораи ба эътидол овардани талаботи бозорҳои ҷумҳурӣ ва беҳтар кардани сифати маҳсулоти саноатӣ қайд кард.