ДАР ҚАЗОН МАСЪАЛАИ МУҲОҶИРОНИ МЕҲНАТИРО МУҲОКИМА НАМУДАНД

                      Маскав, 15 май. (АМИТ «Ховар», Ҳалима Хушқадамова). — Имрӯз дар шаҳри Қазони Ҷумҳурии Тотористон маҷлиси муштараки Шӯрои ҳамоҳангсози роҳбарони мақомоти салоҳиятдори давлатҳои аъзои СААД дар масъалаи мубориза ба муқобили муҳоҷирати ғайриқонунӣ ва Шӯрои сиёсати муҳоҷирати Кумитаи ҳамгироии Ҷомеаи иқтисодии Евразия кушода шуд. Муовини Муншии умумии СААД Валерий Семериков зимни сӯҳбат бо хабарнигорон дар бораи ҳадафҳои гузаронидани маҷлис сухан ронд. Вай зикр намуд, ки гузаронидани маҷлисҳои муштараки ҳар ду созмон ба он вобаста аст, ки масъалаҳои тақвияти муборизаро ба муқобили муҳоҷирати ғайриқонунӣ бе назардошти проблемаҳои дигари муҳоҷирати меҳнатӣ баррасӣ намудан мумкин нест.                      В.Семериков изҳор намуд, ки қисми муҳимтарини сиёсати муҳоҷирати ҳар давлат назорати ҷараёни муҳоҷират ва пешгирии таъсири манфии он ба амнияти миллӣ ва вазъияти ҷомеа мебошад.                      Мухбири АМИТ «Ховар» хабар медиҳад, ки иштирокчиёни маҷлис ҷараёни иҷрои ҳуҷҷати хотимавии машварати муштараки роҳбарони мақомоти дахлдори давлатҳои аъзои ҳар ду созмонро бахшида ба пурзӯр намудани мубориза ба муқобили муҳоҷирати ғайриқонунӣ, амалӣ сохтани сиёсати умумии муҳоҷират, лоиҳаи барномаи ташкили маркази байнидавлатии маълумот дар бораи коргарони муҳоҷир ва масъалаҳои дигарро муҳокима хоҳанд кард.