ДАР НАТИҶАИ ОФАТИ ТАБИӢ 700 ХОНАИ ИСТИҚОМАТӢ ЗАРАР ДИД

                       Душанбе, 15 май. (АМИТ «Ховар», Наргис Бойаҳмадова). — Имрӯз дар ҳузури Сарвазири мамлакат Оқил Оқилов оид ба рафъи оқибатҳои офати табиии машварати корӣ баргузор гардид.                     Дар машварат ҳисоботи шахсони масъул шунида шуда, маълум гардид, ки боришоти пай дар пайи моҳҳои охир ба иқтисодиёти мамлакат ҳисороти зиёд ворид кардааст.                       Аз рӯи ахбороти расида то санаи 12- уми майи соли равон бар асари боришоти зиёд , жола ва баландшавии сатҳи обҳо дар мамлакат пурраю қисман зиёда аз 700 манзили истиқоматӣ зарар дида , 62 км роҳҳои нақлиётгард ва 72 км иншооти обёрӣ хароб шудааст. Ҳамзамон бар асари офати таббиӣ шумораи зиёди муассисаҳои маорифу тандурустӣ ва заминҳои кишоварзӣ зарар дидаанд. Боришоти зиёди шаби 14- ум ба 15- уми моҳи майи соли равон низ ба хоҷагии халқи мамлакат ҳисороти зиёд расонид, ки зарари он муайян карда мешавад.                       Оқил Оқилов барои рафъи бетаъхири оқибатҳои офати табиӣ, муайян кардани шумораи умумии зарардидагон ва расонидани кўмакҳои аввалия ба аҳолии минтақаҳои зарардида ба масъулини вазорату идораҳои давлатӣ дастуру супоришҳо дода, онҳоро вазифадор намуд, ки ҷиҳати иҷрои босифати корҳои барқарорсозӣ ва кўмак ба аҳолии зарардида чораҳои зарурӣ андешанд.