ДАР СУҒД КОРХОНАИ ИСТЕҲСОЛИ ЛАМПА СОХТА МЕШАВАД

                       Душанбе, 22 май. (АМИТ «Ховар», Мавзуна Бойева)- Аз аввали моҳи майи соли 2009 дар қаламрави вилояти Суғд маъракаи ба истифодаи лампаҳои каммасрафи барқӣ гузаштан оғоз гардид. Дар ин бора Раиси вилоят Қоҳир Расулзода, қарор имзо кард.                        Тавре ба мухбири АМИТ «Ховар» аз Маркази иттилоот ва таҳлили Дастгоҳи Раиси вилояти Суғд иттиллоъ доданд, мувофиқи он раисони шаҳру навоҳии вилоят, роҳбарони ташкилоту муассисаҳо ва корхонаҳо новобаста аз шакли моликият ва тобеъияташон то охири соли ҷорӣ ба истифодаи лампаҳои каммасрафи барқӣ мегузаранд. Ҳамзамон ниҳодҳои масъули давлатӣ вазифадор шуданд, ки 88 ҳазор оилаи камбизоати вилоятро бо лампаҳои номбурда таъмин кунанд.                     Тибқи ин қарор баъзе ташкилотҳои дахлдор муваззаф гаштанд, ки дар давоми соли 2009-2011 бо ҷалби сармояи дохилӣ ва хориҷӣ як корхонаи истеҳсоли лампаҳои каммасрафи барқиро дар ҳудуди вилоят сохта ба истифода диҳанд.                       Ёдрас мешавем, ки дар бобати сарфаҷӯёна истифода кардани нерӯи барқ Фармони  Президенти Ҷумҳурии Тоҷикистон Эмомалӣ Раҳмон «Дар бораи тадбирҳои иловагии истифодаи сарфаҷӯёнаи энергия» қабул карда шуд. Қарори раиси вилояти Суғд бо мақсади иҷрои ҳамин фармони Сардори давлат қабул шудааст.