ДАР ВИЛОЯТИ СУҒД 27 ҲАЗОР НАФАР МАКТАБРО ХАТМ ХОҲАНД КАРД

                        Душанбе, 25 май. (АМИТ «Ховар», Бекназари Абӯбакр). — Имрӯз дар ҳудуди вилояти Суғд 894 муассисаи таълимӣ мавҷуд буда, соли ҷорӣ 702 мактаби таҳсилоти ҳамагониро зиёда аз 27 ҳазор нафар хонандагон хатм мекунанд, ки беш аз 13 ҳазор нафарашонро духтарон ташкил медиҳанд.                        Раиси вилояти Суғд Қоҳир Расулзода толибилмонро бо рӯзи хатми мактаб табрик намуда, зикр кард, ки дар давоми соли хониши сипаришуда кори мактабҳои таҳсилоти умумӣ беҳтар ва дастовардҳои омӯзгорону хонандагони вилоят бештар гардид. Аз ҷумла, 46 нафар хатмкунандаи мактабҳои вилоят дар олимпиадаи ҷумҳуриявӣ аз фанҳои таълимӣ сазовори ҷойҳои фахрӣ ва ба гирифтани тавсияномаи Вазорати маорифи Ҷумҳурии Тоҷикистон барои дохилшавӣ ба мактабҳои олӣ мушарраф гардиданд. Дар сессияи ҷумҳуриявии Академияи хурди фанҳо 22 нафар хонандаи мактабҳои вилоят ба гирифтани ҷойҳои аввал ноил гардиданд, ки ин дар ҷумҳурӣ нишондиҳандаи беҳтарин аст. Имсол низ ғолибият дар озмуни касбии ҷумҳуриявии «»Муаллими сол» насиби намояндаи вилояти Суғд гардид.