ДАСТАГУЛИ ФАРҲАНГӢ БА ИФТИХОРИ 20-СОЛАГИИ ИСТИҚЛОЛИЯТИ ДАВЛАТӢ

               Душанбе, 5 май.(АМИТ «Ховар», Марзия Саидова).- Ба ифтихори 20-умин солгарди Истиқлолияти давлатии Ҷумҳурии Тоҷикистон ва 80-умин солгарди Ҷумҳурии Тоҷикистон нашриёти «Контраст»-и Душанбе китоби дастҷамъонаи донишмандони тоҷикро таҳти унвони «Очерки таърихӣ ва назарияи фарҳанги мардуми тоҷик» (қисми 3) ба тозагӣ аз чоп баровард. Китоб бо теъдоди 230 адад бо забони русӣ чоп шудааст.               Муаллифони асар профессорон Аскаралӣ Раҷабов, Рустам Муқимов ва Муҳаммадраҳим Каримзода мебошанд.               Китоб бо ибтикори Академияи илмҳои Ҷумҳурии Тоҷикистон, пажӯҳишгоҳи таърих, бостоншиносӣ ва мардумшиносии ба номи А.Дониш Маркази байналмилалии илмии мусиқии мардумони Шарқ (Борбад) нашр шудааст.              Дар китоб омӯзиши проблемаҳои фарҳанг (таърих, меъморӣ, санъати тасвирӣ, мусиқӣ, санъати театрӣ) аз давраи қадим то имрӯз инъикос ёфтааст. Дар ин қисмати китоб омӯзиши масъалаҳои анъана ва идомаи онҳо, хусусиятҳои таърих ва назарияи фарҳанги халқи тоҷик аз нуқтаи назари таърихию фарҳангӣ ва ҳунарӣ мавқеи намоёнро ишғол кардааст.                Китоб барои доираи васеи фарҳангшиносон, санъатшиносон, бостоншиносон, мусиқишиносон, театршиносон ва донишҷӯёну устодони донишкадаҳои бахши гуманитарию бадеӣ тавсия карда мешавад.