ФЕСТИВАЛИ МУСИҚИИ КАСБИИ «БАҲОРИСТОН» ДАР ДУШАНБЕ ОҒОЗ МЕЁБАД

                     Душанбе, 15 май. (АМИТ «Ховар», Фарангис Раҳимова). — Аз 15-ум то 19-уми май дар Душанбе Фестивали байналмилалии санъати мусиқии касбии «Баҳористон» бо дастгирии молиявии барномаи «Фарҳанг ва ҳунар»-и Институти «Ҷамъияти Кушода» — Бунёди Мадад дар Тоҷикистон баргузор мегардад. Фестивали имсола ба мусиқии фортепиано «PIANO-FORTE» бахшида шудааст.                      Тавре ба АМИТ «Ховар» аз Институти «Ҷамъияти Кушода» — Бунёди Мадад дар Тоҷикистон хабар доданд, тӯли панҷ рӯз консертҳои яккаи пианинонавозон баргузор гардида, дар онҳо барномаҳои махсус барои фестивал омодагардида иҷро хоҳанд шуд. Пианинанавозон нақша доранд барои донишҷӯён ва омӯзгорони Консерваторияи миллии Тоҷикистон машқҳои ҳунарӣ(мастер-класс) ташкил намоянд. Инчунин, дар чаҳорчӯбаи фестивал баргузории консерти пианинонавозони ҷавон аз ҷумлаи толибилмон ва донишҷӯёни омӯзишгоҳҳои мусиқии Тоҷикистон дар назар аст.                    Фестивалҳои байналмилалии санъати мусиқии касбии «Баҳористон», ки дар давоми се соли охир бо дастгирии Шӯъбаи Ташкилоти байналмилалии Институти «Ҷамъияти Кушода» — Бунёди Мадад дар Тоҷикистон баргузор мешаванд, ба ҳукми анъана даромада, дар ҳаёти фарҳангии кишвар саҳм мегузоранд. Бори нахуст ба кишвари мо бо намоишҳои худ пианинонавозони машҳури ҷумҳуриҳои Қазоқистон, Қирғизистон, Россия ва ИМА ташриф намуданд. Ба фикри коршиносони соҳаи фарҳанг, гузаронидани фестивалхои мазкур имконият доданд, то ин ки Консерваторияи тоҷик дар сатҳи байналмилалӣ худро муаррифӣ намояд ва робитаҳои фарҳангиро миёни кишварҳои Осиёи марказӣ ва берун аз он мустаҳкам гардонад. Фестивали «Баҳористон» ҳарсола ташаббусҳои тозаи фарҳангиро эчод мекунад .                     Фестивали аввалини Осиёи Марказии санъати мусиқии касбии «Баҳористон» дар моҳи майи соли 2007-ум баргузор гардид. Дар он омӯзгорон ва донишҷӯёни Консерваторияҳои миллии Қазоқистон, Қирғизистон, Ӯзбекистон ва Тоҷикистон ширкат варзиданд