ИХТИСОРОТИ БУҶЕТИ ДАВЛАТӢ БА МАОШ ДАХЛ НАДОРАД

              Душанбе, 4 май. (АМИТ «Ховар», Бекназари Абӯбакр). — Дар асоси ворид намудани тағйиру иловаҳо ба Қонуни Ҷумҳурии Тоҷикистон «Дар бораи Буҷети давлатии Ҷумҳурии Тоҷикистон барои соли 2009» буҷети мамлакат барои соли равон ба маблағи 459 миллион сомонӣ кам карда шуд.             Дар Вазорати молияи ҷумҳурӣ ба мухбири АМИТ «Ховар» гуфтанд, ки ин масъаларо дар ҷаласаи навбатии иҷлосияи 5-уми Маҷлиси намояндагони Маҷлиси Олии ҷумҳурӣ вазири молияи мамлакат Сафаралӣ Наҷмиддинов шарҳ дода гуфт, ки сабаби коҳиш додани буҷети давлатӣ ин пеш аз ҳама шиддатёбии бӯҳрони молиявӣ аст, ки он ба кишвари мо низ таъсири худро расонида истодааст.             Мавриди зикр аст, ки маблағҳои ихтисор карда, асосан ба соҳаи сохтмон, иншооте, ки сохтмонашон чандон муҳим нест, таъмиру таҷдиди биноҳои вазорату идораҳо, муассисаҳо ва сафарҳои хизматӣ ҷудо гардида буданд, дахл дорад. Он ба маоши кормандони бахшҳои гуногуни кишвар таъсир нахоҳад гузошт.               Бояд тазаккур дод, ки буҷети ҷории давлатии Ҷумҳурии Тоҷикистон барои соли 2009 беш аз 4,3 миллиард сомониро ташкил медиҳад, ки қисмати бештари он барои рушди соҳаҳои иҷтимоии мамлакат нигаронида шудааст.