КӮМАКИ БОНКИ ҶАҲОНӢ БА ТОҶИКИСТОН

                        Душанбе, 28 май. (АМИТ «Ховар», Бекназари Абӯбакр). — Дирӯз дар Вазорати молияи ҷумҳурӣ маросими имзои созишнома дар бораи ҷудо кардани маблағ барои иҷрои барномаи беҳтар сохтани идораи молияи давлатӣ байни Тоҷикистон ва Ассосиатсияи байналмилалии рушд баргузор гардид. Тибқи созишнома, Бонки ҷаҳонӣ ба Тоҷикистон бо ин мақсад ба маблағи 5 миллион доллари ИМА кӯмак мерасонад. Созишномаро вазири молияи Ҷумҳурии Тоҷикистон Сафаралӣ Наҷмиддинов ва намояндаи доимии Бонки ҷаҳонӣ дар Тоҷикистон Кёр Бронки имзо карданд.                      Ҳадафи барнома бештар сохтани самара ва таъмини шаффофияти идораи соҳаи молия бо роҳи тақвияти фаъолияти ташкили буҷет ва хазинадорӣ, ташкил ва истифодаи системаи автоматиконидашудаи иттилоотии идораи молия ва афзун гардондани имкониятҳои соҳаҳои асосии идораи молияи давлатӣ мебошад.                      Барнома барои дастгирии ислоҳоти алоҳидаи асосии идораи соҳаи молия барои солҳои 2009 — 2018 тартиб дода шудааст, ки онро барномаи стратегии идораи соҳаи молия аз тарафи ҳукумат, ташкили имкониятҳои самарабахши Вазорати молия ва ташкилоту идораҳои дигари дахлдор муайян менамояд.                      Барнома афзун гардондани имкониятҳои идораи соҳаи молия, самараноктар гардондани тартиботи асосии идораи соҳаи молия ва тайёрӣ ба автоматӣ кунонидани амалиёти асосии идораи соҳаи молияи давлатиро дар бар мегирад.                      Барои иҷрои барнома аз ҳисоби маблағҳои кӯмаки Ассоситасияи байналмилалии рушд, инчунин, маблағгузории иловагии Ҳукумати Ҷопон, Ҳукумати Британияи Кабир ва Комиссияи Аврупо маблағ ҷудо карда хоҳад шуд. Ҳукумати Швейтсария айни ҳол имконияти расондани кӯмакро ба Тоҷикистон барои гузаронидани ислоҳоти ҳисобу китоби бухгалтерӣ дар сектори давлатӣ баррасӣ менамояд.                     Давраи иҷрои барнома аз 31 августи соли 2009 то 31 августи соли 2014 пешбинӣ карда мешавад.