КОРХОНАҲОИ НАВ БА КОР САР КАРДАНД

                Қӯрғонтеппа, 5 май. (АМИТ «Ховар», Мурод Сотиев). — Дар шаҳри Сарбанд якбора се корхонаи нав ба кор шурӯъ намуд. Ин имкон дод, ки истеҳсоли маҳсулоти ватанӣ бештар карда, теъдоди зиёди одамон бо кор таъмин карда шаванд.                Яке аз ин корхонаҳо корхонаи ордкашӣ мебошад. Корхона дар давраи аввал ҳар шабонарӯз 80 — 90 тонна орд истеҳсол мекунад. Айни ҳол дар ин ҷо 30 нафар кор карда, ба ҳисоби миёна 300 сомонӣ маош мегиранд. Ояндаи наздик баъди ба кор даромадани коргоҳҳои иловагӣ боз 30 нафари дигар ба кор ҷалб карда мешавад.                 Дар корхонаи нави истеҳсоли регу шағал 16 нафар ба кор қабул карда шуд. Корхона айни ҳол ҳар рӯз то 200 тонна регу шағал истеҳсол мекунад. Бинои нави хизмати маишӣ дар даромадгоҳи шаҳри Сарбанд қомат афрохт. Рӯзи аввал дар ин ҷо 10 нафар сокини маҳаллӣ соҳиби ҷои кор гардид. Мухбири АМИТ «Ховар» хабар медиҳад, ки рӯзҳои наздик ба корхона 30 нафари дигар ба кор қабул карда мешавад.