МАҲСУЛОТИ «ТАКОМУЛ» ВА «ПОМИРЧАРМ» БА ХОРИҶА ФИРИСТОДА МЕШАВАД

                       Душанбе, 21 май. (АМИТ «Ховар», Кристина Эрлих).- Ҷамъияти масъулияташ маҳдуди «Такомул» ва корхонаи муштараки Тоҷикистону Афғонистон «Помирчарм» ба истеҳсоли маҳсулот сар карданд. Аз раёсати саноати сабуки Вазорати энергетика ва саноати ҶТ ба АМИТ «Ховар» хабар доданд, ки маҳсулоти ин корхонаҳо ба хориҷа фиристода мешавад.                        Ин корхонаҳо дар доираи Барномаи ҳукуматии «Коркарди пурраи маҳсулоти чорво (пӯст ва пашм) то соли 2015» дар заминаи ҶС «Интерфёр» ташкил ёфтаанд. Корхонаи «Такомул» аз чарм маснуоти гуногун тайёр мекунанд, корхонаи «Помирчарм» ба коркарди пӯст махсус гардонида шудааст.                        Иқтидори «Помирчарм» дар давоми як моҳ то 30 ҳозор дона пӯстро барои истеҳсол кардани маҳсулот омода мекунад. Ин бо маблағгузории ширкати Афғонистон «Афғончарм» имконпазир мегардад.                       Дар ҳар ду корхона тамоми таҷҳизот тармим карда шуд, мутахассисони Ҳиндустон роҳу усулҳои истифодаи онҳоро бо ҳамкасбони тоҷикашон омӯхтанд.